1.001.01a agním īḻe puróhitaṃ yajñásya devám ṛtvíjam - Linguistics

1.003.03a dásrā yuvā́kavaḥ sutā́ nā́satyā vṛktábarhiṣaḥ |
1.003.03c ā́ yātaṃ rudravartanī ‖
1.003.04a índrā́ yāhi citrabhāno sutā́ imé tvāyávaḥ |
1.003.04c áṇvībhis tánā pūtā́saḥ ‖
1.003.05a índrā́ yāhi dhiyéṣitó víprajūtaḥ sutā́vataḥ |
1.003.05c úpa bráhmāṇi vāghátaḥ ‖
1.003.06a índrā́ yāhi tū́tujāna úpa bráhmāṇi harivaḥ |
1.003.06c suté dadhiṣva naś cánaḥ ‖
1.003.07a ómāsaś carṣaṇīdhṛto víśve devāsa ā́ gata |
1.003.07c dāśvā́ṃso dāśúṣaḥ sutám ‖
1.003.08a víśve devā́so aptúraḥ sutám ā́ ganta tū́rṇayaḥ |
1.003.08c usrā́ iva svásarāṇi ‖
1.003.09a víśve devā́so asrídha éhimāyāso adrúhaḥ |
1.003.09c médhaṃ juṣanta váhnayaḥ ‖
1.003.10a pāvakā́ naḥ sárasvatī vā́jebhir vājínīvatī |
1.003.10c yajñáṃ vaṣṭu dhiyā́vasuḥ ‖
1.003.11a codayitrī́ sūnṛ́tānāṃ cétantī sumatīnā́m |
1.003.11c yajñáṃ dadhe sárasvatī ‖
1.003.12a mahó árṇaḥ sárasvatī prá cetayati ketúnā |
1.003.12c dhíyo víśvā ví rājati ‖
1.004.01a surūpakṛtnúm ūtáye sudúghām iva godúhe |
1.004.01c juhūmási dyávi-dyavi ‖
1.004.02a úpa naḥ sávanā́ gahi sómasya somapāḥ piba |
1.004.02c godā́ íd reváto mádaḥ ‖
1.004.03a áthā te ántamānāṃ vidyā́ma sumatīnā́m |
1.004.03c mā́ no áti khya ā́ gahi ‖
1.004.04a párehi vígram ástṛtam índram pṛchā vipaścítam |
1.004.04c yás te sákhibhya ā́ váram ‖
1.004.05a utá bruvantu no nído nír anyátaś cid ārata |
1.004.05c dádhānā índra íd dúvaḥ ‖
1.004.06a utá naḥ subhágām̐ arír vocéyur dasma kṛṣṭáyaḥ |
1.004.06c syā́méd índrasya śármaṇi ‖
1.004.07a ém āśúm āśáve bhara yajñaśríyaṃ nṛmā́danam |
1.004.07c patayán mandayátsakham ‖
1.004.08a asyá pītvā́ śatakrato ghanó vṛtrā́ṇām abhavaḥ |
1.004.08c prā́vo vā́jeṣu vājínam ‖
1.004.09a táṃ tvā vā́jeṣu vājínaṃ vājáyāmaḥ śatakrato |
1.004.09c dhánānām indra sātáye ‖
1.004.10a yó rāyò 'vánir mahā́n supāráḥ sunvatáḥ sákhā |
1.004.10c tásmā índrāya gāyata ‖
1.005.01a ā́ tv étā ní ṣīdaténdram abhí prá gāyata |
1.005.01c sákhāya stómavāhasaḥ ‖
1.005.02a purūtámam purūṇā́m ī́śānaṃ vā́ryāṇām |