1.001.01a agním īḻe puróhitaṃ yajñásya devám ṛtvíjam - Linguistics

1.102.11a viśvā́héndro adhivaktā́ no astv áparihvṛtāḥ sanuyāma vā́jam |
1.102.11c tán no mitró váruṇo māmahantām áditiḥ síndhuḥ pṛthivī́ utá dyaúḥ ‖
1.103.01a tát ta indriyám paramám parācaír ádhārayanta kaváyaḥ purédám |
1.103.01c kṣamédám anyád divy ànyád asya sám ī pṛcyate samanéva ketúḥ ‖
1.103.02a sá dhārayat pṛthivī́m papráthac ca vájreṇa hatvā́ nír apáḥ sasarja |
1.103.02c áhann áhim ábhinad rauhiṇáṃ vy áhan vyàṃsam maghávā śácībhiḥ ‖
1.103.03a sá jātū́bharmā śraddádhāna ójaḥ púro vibhindánn acarad ví dā́sīḥ |
1.103.03c vidvā́n vajrin dásyave hetím asyā́ryaṃ sáho vardhayā dyumnám indra ‖
1.103.04a tád ūcúṣe mā́nuṣemā́ yugā́ni kīrtényam maghávā nā́ma bíbhrat |
1.103.04c upaprayán dasyuhátyāya vajrī́ yád dha sūnúḥ śrávase nā́ma dadhé ‖
1.103.05a tád asyedám paśyatā bhū́ri puṣṭáṃ śrád índrasya dhattana vīry/ya |
1.103.05c sá gā́ avindat só avindad áśvān sá óṣadhīḥ só apáḥ sá vánāni ‖
1.103.06a bhū́rikarmaṇe vṛṣabhā́ya vṛ́ṣṇe satyáśuṣmāya sunavāma sómam |
1.103.06c yá ādṛ́tyā paripanthī́va śū́ró 'yajvano vibhájann éti védaḥ ‖
1.103.07a tád indra préva vīryàṃ cakartha yát sasántaṃ vájreṇā́bodhayó 'him |
1.103.07c ánu tvā pátnīr hṛṣitáṃ váyaś ca víśve devā́so amadann ánu tvā ‖
1.103.08a śúṣṇam pípruṃ kúyavaṃ vṛtrám indra yadā́vadhīr ví púraḥ śámbarasya |
1.103.08c tán no mitró váruṇo māmahantām áditiḥ síndhuḥ pṛthivī́ utá dyaúḥ ‖
1.104.01a yóniṣ ṭa indra niṣáde akāri tám ā́ ní ṣīda svānó nā́rvā |
1.104.01c vimúcyā váyo 'vasā́yā́śvān doṣā́ vástor váhīyasaḥ prapitvé ‖
1.104.02a ó tyé nára índram ūtáye gur nū́ cit tā́n sadyó ádhvano jagamyāt |
1.104.02c devā́so manyúṃ dā́sasya ścamnan té na ā́ vakṣan suvitā́ya várṇam ‖
1.104.03a áva tmánā bharate kétavedā áva tmánā bharate phénam udán |
1.104.03c kṣīréṇa snātaḥ kúyavasya yóṣe haté té syātām pravaṇé śíphāyāḥ ‖
1.104.04a yuyópa nā́bhir úparasyāyóḥ prá pū́rvābhis tirate rā́ṣṭi śū́raḥ |
1.104.04c añjasī́ kuliśī́ vīrápatnī páyo hinvānā́ udábhir bharante ‖
1.104.05a práti yát syā́ nī́thā́darśi dásyor óko nā́chā sádanaṃ jānatī́ gāt |
1.104.05c ádha smā no maghavañ carkṛtā́d ín mā́ no maghéva niṣṣapī́ párā dāḥ ‖
1.104.06a sá tváṃ na indra sū́rye só apsv ànāgāstvá ā́ bhaja jīvaśaṃsé |
1.104.06c mā́ntarām bhújam ā́ rīriṣo naḥ śráddhitaṃ te mahatá indriyā́ya ‖
1.104.07a ádhā manye śrát te asmā adhāyi vṛ́ṣā codasva mahaté dhánāya |
1.104.07c mā́ no ákṛte puruhūta yónāv índra kṣúdhyadbhyo váya āsutíṃ dāḥ ‖
1.104.08a mā́ no vadhīr indra mā́ párā dā mā́ naḥ priyā́ bhójanāni prá moṣīḥ |
1.104.08c āṇḍā́ mā́ no maghavañ chakra nír bhen mā́ naḥ pā́trā bhet sahájānuṣāṇi ‖
1.104.09a arvā́ṅ éhi sómakāmaṃ tvāhur ayáṃ sutás tásya pibā mádāya |
1.104.09c uruvyácā jaṭhára ā́ vṛṣasva pitéva naḥ śṛṇuhi hūyámānaḥ ‖
1.105.01a candrámā apsv àntár ā́ suparṇó dhāvate diví |
1.105.01c ná vo hiraṇyanemayaḥ padáṃ vindanti vidyuto vittám me asyá rodasī ‖
1.105.02a ártham íd vā́ u arthína ā́ jāyā́ yuvate pátim |
1.105.02c tuñjā́te vṛ́ṣṇyam páyaḥ paridā́ya rásaṃ duhe vittám me asyá rodasī ‖