1.001.01a agním īḻe puróhitaṃ yajñásya devám ṛtvíjam - Linguistics

1.058.05a tápurjambho vána ā́ vā́tacodito yūthé ná sāhvā́m̐ áva vāti váṃsagaḥ |
1.058.05c abhivrájann ákṣitam pā́jasā rája sthātúś carátham bhayate patatríṇaḥ ‖
1.058.06a dadhúṣ ṭvā bhṛ́gavo mā́nuṣeṣv ā́ rayíṃ ná cā́ruṃ suhávaṃ jánebhyaḥ |
1.058.06c hótāram agne átithiṃ váreṇyam mitráṃ ná śévaṃ divyā́ya jánmane ‖
1.058.07a hótāraṃ saptá juhvò yájiṣṭhaṃ yáṃ vāgháto vṛṇáte adhvaréṣu |
1.058.07c agníṃ víśveṣām aratíṃ vásūnāṃ saparyā́mi práyasā yā́mi rátnam ‖
1.058.08a áchidrā sūno sahaso no adyá stotṛ́bhyo mitramahaḥ śárma yacha |
1.058.08c ágne gṛṇántam áṃhasa uruṣyórjo napāt pūrbhír ā́yasībhiḥ ‖
1.058.09a bhávā várūthaṃ gṛṇaté vibhāvo bhávā maghavan maghávadbhyaḥ śárma |
1.058.09c uruṣyā́gne áṃhaso gṛṇántam prātár makṣū́ dhiyā́vasur jagamyāt ‖
1.059.01a vayā́ íd agne agnáyas te anyé tvé víśve amṛ́tā mādayante |
1.059.01c vaíśvānara nā́bhir asi kṣitīnā́ṃ sthū́ṇeva jánām̐ upamíd yayantha ‖
1.059.02a mūrdhā́ divó nā́bhir agníḥ pṛthivyā́ áthābhavad aratī́ ródasyoḥ |
1.059.02c táṃ tvā devā́so 'janayanta deváṃ vaíśvānara jyótir íd ā́ryāya ‖
1.059.03a ā́ sū́rye ná raśmáyo dhruvā́so vaiśvānaré dadhire 'gnā́ vásūni |
1.059.03c yā́ párvateṣv óṣadhīṣv apsú yā́ mā́nuṣeṣv ási tásya rā́jā ‖
1.059.04a bṛhatī́ iva sūnáve ródasī gíro hótā manuṣyò ná dákṣaḥ |
1.059.04c svàrvate satyáśuṣmāya pūrvī́r vaiśvānarā́ya nṛ́tamāya yahvī́ḥ ‖
1.059.05a diváś cit te bṛható jātavedo vaíśvānara prá ririce mahitvám |
1.059.05c rā́jā kṛṣṭīnā́m asi mā́nuṣīṇāṃ yudhā́ devébhyo várivaś cakartha ‖
1.059.06a prá nū́ mahitváṃ vṛṣabhásya vocaṃ yám pūrávo vṛtraháṇaṃ sácante |
1.059.06c vaiśvānaró dásyum agnír jaghanvā́m̐ ádhūnot kā́ṣṭhā áva śámbaram bhet ‖
1.059.07a vaiśvānaró mahimnā́ viśvákṛṣṭir bharádvājeṣu yajató vibhā́vā |
1.059.07c śātavaneyé śatínībhir agníḥ puruṇīthé jarate sūnṛ́tāvān ‖
1.060.01a váhniṃ yaśásaṃ vidáthasya ketúṃ suprāvyàṃ dūtáṃ sadyóartham |
1.060.01c dvijánmānaṃ rayím iva praśastáṃ rātím bharad bhṛ́gave mātaríśvā ‖
1.060.02a asyá śā́sur ubháyāsaḥ sacante havíṣmanta uśíjo yé ca mártāḥ |
1.060.02c diváś cit pū́rvo ny àsādi hótāpṛ́chyo viśpátir vikṣú vedhā́ḥ ‖
1.060.03a táṃ návyasī hṛdá ā́ jā́yamānam asmát sukīrtír mádhujihvam aśyāḥ |
1.060.03c yám ṛtvíjo vṛjáne mā́nuṣāsaḥ práyasvanta āyávo jī́jananta ‖
1.060.04a uśík pāvakó vásur mā́nuṣeṣu váreṇyo hótādhāyi vikṣú |
1.060.04c dámūnā gṛhápatir dáma ā́m̐ agnír bhuvad rayipátī rayīṇā́m ‖
1.060.05a táṃ tvā vayám pátim agne rayīṇā́m prá śaṃsāmo matíbhir gótamāsaḥ |
1.060.05c āśúṃ ná vājambharám marjáyantaḥ prātár makṣū́ dhiyā́vasur jagamyāt ‖
1.061.01a asmā́ íd u prá taváse turā́ya práyo ná harmi stómam mā́hināya |
1.061.01c ṛ́cīṣamāyā́dhrigava óham índrāya bráhmāṇi rātátamā ‖
1.061.02a asmā́ íd u práya iva prá yaṃsi bhárāmy āṅgūṣám bā́dhe suvṛktí |
1.061.02c índrāya hṛdā́ mánasā manīṣā́ pratnā́ya pátye dhíyo marjayanta ‖
1.061.03a asmā́ íd u tyám upamáṃ svarṣā́m bhárāmy āṅgūṣám āsyèna |
1.061.03c máṃhiṣṭham áchoktibhir matīnā́ṃ suvṛktíbhiḥ sūríṃ vāvṛdhádhyai ‖
1.061.04a asmā́ íd u stómaṃ sáṃ hinomi ráthaṃ ná táṣṭeva tátsināya |