1.001.01a agním īḻe puróhitaṃ yajñásya devám ṛtvíjam - Linguistics

1.099.01a jātávedase sunavāma sómam arātīyató ní dahāti védaḥ |
1.099.01c sá naḥ parṣad áti durgā́ṇi víśvā nāvéva síndhuṃ duritā́ty agníḥ ‖
1.100.01a sá yó vṛ́ṣā vṛ́ṣṇyebhiḥ sámokā mahó diváḥ pṛthivyā́ś ca samrā́ṭ |
1.100.01c satīnásatvā hávyo bháreṣu marútvān no bhavatv índra ūtī́ ‖
1.100.02a yásyā́nāptaḥ sū́ryasyeva yā́mo bháre-bhare vṛtrahā́ śúṣmo ásti |
1.100.02c vṛ́ṣantamaḥ sákhibhiḥ svébhir évair marútvān no bhavatv índra ūtī́ ‖
1.100.03a divó ná yásya rétaso dúghānāḥ pánthāso yánti śávasā́parītāḥ |
1.100.03c taráddveṣāḥ sāsahíḥ paúṃsyebhir marútvān no bhavatv índra ūtī́ ‖
1.100.04a só áṅgirobhir áṅgirastamo bhūd vṛ́ṣā vṛ́ṣabhiḥ sákhibhiḥ sákhā sán |
1.100.04c ṛgmíbhir ṛgmī́ gātúbhir jyéṣṭho marútvān no bhavatv índra ūtī́ ‖
1.100.05a sá sūnúbhir ná rudrébhir ṛ́bhvā nṛṣā́hye sāsahvā́m̐ amítrān |
1.100.05c sánīḻebhiḥ śravasy/ni tū́rvan marútvān no bhavatv índra ūtī́ ‖
1.100.06a sá manyumī́ḥ samádanasya kartā́smā́kebhir nṛ́bhiḥ sū́ryaṃ sanat |
1.100.06c asmínn áhan sátpatiḥ puruhūtó marútvān no bhavatv índra ūtī́ ‖
1.100.07a tám ūtáyo raṇayañ chū́rasātau táṃ kṣémasya kṣitáyaḥ kṛṇvata trā́m |
1.100.07c sá víśvasya karúṇasyeśa éko marútvān no bhavatv índra ūtī́ ‖
1.100.08a tám apsanta śávasa utsavéṣu náro náram ávase táṃ dhánāya |
1.100.08c só andhé cit támasi jyótir vidan marútvān no bhavatv índra ūtī́ ‖
1.100.09a sá savyéna yamati vrā́dhataś cit sá dakṣiṇé sáṃgṛbhītā kṛtā́ni |
1.100.09c sá kīríṇā cit sánitā dhánāni marútvān no bhavatv índra ūtī́ ‖
1.100.10a sá grā́mebhiḥ sánitā sá ráthebhir vidé víśvābhiḥ kṛṣṭíbhir nv àdyá |
1.100.10c sá paúṃsyebhir abhibhū́r áśastīr marútvān no bhavatv índra ūtī́ ‖
1.100.11a sá jāmíbhir yát samájāti mīḻhé 'jāmibhir vā puruhūtá évaiḥ |
1.100.11c apā́ṃ tokásya tánayasya jeṣé marútvān no bhavatv índra ūtī́ ‖
1.100.12a sá vajrabhṛ́d dasyuhā́ bhīmá ugráḥ sahásracetāḥ śatánītha ṛ́bhvā |
1.100.12c camrīṣó ná śávasā pā́ñcajanyo marútvān no bhavatv índra ūtī́ ‖
1.100.13a tásya vájraḥ krandati smát svarṣā́ divó ná tveṣó raváthaḥ śímīvān |
1.100.13c táṃ sacante sanáyas táṃ dhánāni marútvān no bhavatv índra ūtī́ ‖
1.100.14a yásyā́jasraṃ śávasā mā́nam ukthám paribhujád ródasī viśvátaḥ sīm |
1.100.14c sá pāriṣat krátubhir mandasānó marútvān no bhavatv índra ūtī́ ‖
1.100.15a ná yásya devā́ devátā ná mártā ā́paś caná śávaso ántam āpúḥ |
1.100.15c sá praríkvā tvákṣasā kṣmó diváś ca marútvān no bhavatv índra ūtī́ ‖
1.100.16a rohíc chyāvā́ sumádaṃśur lalāmī́r dyukṣā́ rāyá ṛjrā́śvasya |
1.100.16c vṛ́ṣaṇvantam bíbhratī dhūrṣú rátham mandrā́ ciketa nā́huṣīṣu vikṣú ‖
1.100.17a etát tyát ta indra vṛ́ṣṇa uktháṃ vārṣāgirā́ abhí gṛṇanti rā́dhaḥ |
1.100.17c ṛjrā́śvaḥ práṣṭibhir ambarī́ṣaḥ sahádevo bháyamānaḥ surā́dhāḥ ‖
1.100.18a dásyūñ chímyūṃś ca puruhūtá évair hatvā́ pṛthivyā́ṃ śárvā ní barhīt |
1.100.18c sánat kṣétraṃ sákhibhiḥ śvitnyébhiḥ sánat sū́ryaṃ sánad apáḥ suvájraḥ ‖
1.100.19a viśvā́héndro adhivaktā́ no astv áparihvṛtāḥ sanuyāma vā́jam |
1.100.19c tán no mitró váruṇo māmahantām áditiḥ síndhuḥ pṛthivī́ utá dyaúḥ ‖
1.101.01a prá mandíne pitumád arcatā váco yáḥ kṛṣṇágarbhā niráhann ṛjíśvanā |
1.101.01c avasyávo vṛ́ṣaṇaṃ vájradakṣiṇam marútvantaṃ sakhyā́ya havāmahe ‖