1.001.01a agním īḻe puróhitaṃ yajñásya devám ṛtvíjam - Linguistics

1.161.05a hánāmainām̐ íti tváṣṭā yád ábravīc camasáṃ yé devapā́nam ánindiṣuḥ |
1.161.05c anyā́ nā́māni kṛṇvate suté sácām̐ anyaír enān kany/ nā́mabhi sparat ‖
1.161.06a índro hárī yuyujé aśvínā rátham bṛ́haspátir viśvárūpām úpājata |
1.161.06c ṛbhúr víbhvā vā́jo devā́m̐ agachata svápaso yajñíyam bhāgám aitana ‖
1.161.07a níś cármaṇo gā́m ariṇīta dhītíbhir yā́ járantā yuvaśā́ tā́kṛṇotana |
1.161.07c saúdhanvanā áśvād áśvam atakṣata yuktvā́ rátham úpa devā́m̐ ayātana ‖
1.161.08a idám udakám pibatéty abravītanedáṃ vā ghā pibatā muñjanéjanam |
1.161.08c saúdhanvanā yádi tán néva háryatha tṛtī́ye ghā sávane mādayādhvai ‖
1.161.09a ā́po bhū́yiṣṭhā íty éko abravīd agnír bhū́yiṣṭha íty anyó abravīt |
1.161.09c vadharyántīm bahúbhyaḥ praíko abravīd ṛtā́ vádantaś camasā́m̐ apiṃśata ‖
1.161.10a śroṇā́m éka udakáṃ gā́m ávājati māṃsám ékaḥ piṃśati sūnáyā́bhṛtam |
1.161.10c ā́ nimrúcaḥ śákṛd éko ápābharat kíṃ svit putrébhyaḥ pitárā úpāvatuḥ ‖
1.161.11a udvátsv asmā akṛṇotanā tṛ́ṇaṃ nivátsv apáḥ svapasyáyā naraḥ |
1.161.11c ágohyasya yád ásastanā gṛhé tád adyédám ṛbhavo nā́nu gachatha ‖
1.161.12a sammī́lya yád bhúvanā paryásarpata kvà svit tātyā́ pitárā va āsatuḥ |
1.161.12c áśapata yáḥ karásnaṃ va ādadé yáḥ prā́bravīt pró tásmā abravītana ‖
1.161.13a suṣupvā́ṃsa ṛbhavas tád apṛchatā́gohya ká idáṃ no abūbudhat |
1.161.13c śvā́nam bastó bodhayitā́ram abravīt saṃvatsará idám adyā́ vy àkhyata ‖
1.161.14a divā́ yānti marúto bhū́myāgnír ayáṃ vā́to antárikṣeṇa yāti |
1.161.14c adbhír yāti váruṇaḥ samudraír yuṣmā́m̐ ichántaḥ śavaso napātaḥ ‖
1.162.01a mā́ no mitró váruṇo aryamā́yúr índra ṛbhukṣā́ marútaḥ pári khyan |
1.162.01c yád vājíno devájātasya sápteḥ pravakṣyā́mo vidáthe vīry/ṇi ‖
1.162.02a yán nirṇíjā rékṇasā prā́vṛtasya rātíṃ gṛbhītā́m mukható náyanti |
1.162.02c súprāṅ ajó mémyad viśvárūpa indrāpūṣṇóḥ priyám ápy eti pā́thaḥ ‖
1.162.03a eṣá chā́gaḥ puró áśvena vājínā pūṣṇó bhāgó nīyate viśvádevyaḥ |
1.162.03c abhipríyaṃ yát puroḻā́śam árvatā tváṣṭéd enaṃ sauśravasā́ya jinvati ‖
1.162.04a yád dhaviṣyàm ṛtuśó devayā́naṃ trír mā́nuṣāḥ páry áśvaṃ náyanti |
1.162.04c átrā pūṣṇáḥ prathamó bhāgá eti yajñáṃ devébhyaḥ prativedáyann ajáḥ ‖
1.162.05a hótādhvaryúr ā́vayā agnimindhó grāvagrābhá utá śáṃstā súvipraḥ |
1.162.05c téna yajñéna svàraṃkṛtena svìṣṭena vakṣáṇā ā́ pṛṇadhvam ‖
1.162.06a yūpavraskā́ utá yé yūpavāhā́ś caṣā́laṃ yé aśvayūpā́ya tákṣati |
1.162.06c yé cā́rvate pácanaṃ sambháranty utó téṣām abhígūrtir na invatu ‖
1.162.07a úpa prā́gāt sumán me 'dhāyi mánma devā́nām ā́śā úpa vītápṛṣṭhaḥ |
1.162.07c ánv enaṃ víprā ṛ́ṣayo madanti devā́nām puṣṭé cakṛmā subándhum ‖
1.162.08a yád vājíno dā́ma saṃdā́nam árvato yā́ śīrṣaṇy/ raśanā́ rájjur asya |
1.162.08c yád vā ghāsya prábhṛtam āsyè tṛ́ṇaṃ sárvā tā́ te ápi devéṣv astu ‖
1.162.09a yád áśvasya kravíṣo mákṣikā́śa yád vā svárau svádhitau riptám ásti |
1.162.09c yád dhástayoḥ śamitúr yán nakhéṣu sárvā tā́ te ápi devéṣv astu ‖
1.162.10a yád ū́vadhyam udárasyāpavā́ti yá āmásya kravíṣo gandhó ásti |
1.162.10c sukṛtā́ tác chamitā́raḥ kṛṇvantūtá médhaṃ śṛtapā́kam pacantu ‖
1.162.11a yát te gā́trād agnínā pacyámānād abhí śū́laṃ níhatasyāvadhā́vati |
1.162.11c mā́ tád bhū́myām ā́ śriṣan mā́ tṛ́ṇeṣu devébhyas tád uśádbhyo rātám astu ‖
1.162.12a yé vājínam paripáśyanti pakváṃ yá īm āhúḥ surabhír nír haréti |
1.162.12c yé cā́rvato māṃsabhikṣā́m upā́sata utó téṣām abhígūrtir na invatu ‖