1.001.01a agním īḻe puróhitaṃ yajñásya devám ṛtvíjam - Linguistics

1.148.01c ní yáṃ dadhúr manuṣy/su vikṣú svàr ṇá citráṃ vápuṣe vibhā́vam ‖
1.148.02a dadānám ín ná dadabhanta mánmāgnír várūtham máma tásya cākan |
1.148.02c juṣánta víśvāny asya kármópastutim bháramāṇasya kāróḥ ‖
1.148.03a nítye cin nú yáṃ sádane jagṛbhré práśastibhir dadhiré yajñíyāsaḥ |
1.148.03c prá sū́ nayanta gṛbháyanta iṣṭā́v áśvāso ná rathyò rārahāṇā́ḥ ‖
1.148.04a purū́ṇi dasmó ní riṇāti jámbhair ā́d rocate vána ā́ vibhā́vā |
1.148.04c ā́d asya vā́to ánu vāti śocír ástur ná śáryām asanā́m ánu dyū́n ‖
1.148.05a ná yáṃ ripávo ná riṣaṇyávo gárbhe sántaṃ reṣaṇā́ reṣáyanti |
1.148.05c andhā́ apaśyā́ ná dabhann abhikhyā́ nítyāsa īm pretā́ro arakṣan ‖
1.149.01a maháḥ sá rāyá éṣate pátir dánn iná inásya vásunaḥ padá ā́ |
1.149.01c úpa dhrájantam ádrayo vidhánn ít ‖
1.149.02a sá yó vṛ́ṣā narā́ṃ ná ródasyoḥ śrávobhir ásti jīvápītasargaḥ |
1.149.02c prá yáḥ sasrāṇáḥ śiśrītá yónau ‖
1.149.03a ā́ yáḥ púraṃ nā́rmiṇīm ádīded átyaḥ kavír nabhanyò nā́rvā |
1.149.03c sū́ro ná rurukvā́ñ chatā́tmā ‖
1.149.04a abhí dvijánmā trī́ rocanā́ni víśvā rájāṃsi śuśucānó asthāt |
1.149.04c hótā yájiṣṭho apā́ṃ sadhásthe ‖
1.149.05a ayáṃ sá hótā yó dvijánmā víśvā dadhé vā́ryāṇi śravasyā́ |
1.149.05c márto yó asmai sutúko dadā́śa ‖
1.150.01a purú tvā dāśvā́n voce 'rír agne táva svid ā́ |
1.150.01c todásyeva śaraṇá ā́ mahásya ‖
1.150.02a vy àninásya dhanínaḥ prahoṣé cid áraruṣaḥ |
1.150.02c kadā́ caná prajígato ádevayoḥ ‖
1.150.03a sá candró vipra mártyo mahó vrā́dhantamo diví |
1.150.03c prá-prét te agne vanúṣaḥ syāma ‖
1.151.01a mitráṃ ná yáṃ śímyā góṣu gavyávaḥ svādhyò vidáthe apsú jī́janan |
1.151.01c árejetāṃ ródasī pā́jasā girā́ práti priyáṃ yajatáṃ janúṣām ávaḥ ‖
1.151.02a yád dha tyád vām purumīḻhásya somínaḥ prá mitrā́so ná dadhiré svābhúvaḥ |
1.151.02c ádha krátuṃ vidataṃ gātúm árcata utá śrutaṃ vṛṣaṇā pasty/vataḥ ‖
1.151.03a ā́ vām bhūṣan kṣitáyo jánma ródasyoḥ pravā́cyaṃ vṛṣaṇā dákṣase mahé |
1.151.03c yád īm ṛtā́ya bháratho yád árvate prá hótrayā śímyā vītho adhvarám ‖
1.151.04a prá sā́ kṣitír asura yā́ máhi priyá ṛ́tāvānāv ṛtám ā́ ghoṣatho bṛhát |
1.151.04c yuváṃ divó bṛható dákṣam ābhúvaṃ gā́ṃ ná dhury úpa yuñjāthe apáḥ ‖
1.151.05a mahī́ átra mahinā́ vā́ram ṛṇvatho 'reṇávas túja ā́ sádman dhenávaḥ |
1.151.05c sváranti tā́ uparátāti sū́ryam ā́ nimrúca uṣásas takvavī́r iva ‖
1.151.06a ā́ vām ṛtā́ya keśínīr anūṣata mítra yátra váruṇa gātúm árcathaḥ |
1.151.06c áva tmánā sṛjátam pínvataṃ dhíyo yuváṃ víprasya mánmanām irajyathaḥ ‖
1.151.07a yó vāṃ yajñaíḥ śaśamānó ha dā́śati kavír hótā yájati manmasā́dhanaḥ |
1.151.07c úpā́ha táṃ gáchatho vīthó adhvarám áchā gíraḥ sumatíṃ gantam asmayū́ ‖
1.151.08a yuvā́ṃ yajñaíḥ prathamā́ góbhir añjata ṛ́tāvānā mánaso ná práyuktiṣu |