1.001.01a agním īḻe puróhitaṃ yajñásya devám ṛtvíjam - Linguistics

1.120.12c ubhā́ tā́ básri naśyataḥ ‖
1.121.01a kád itthā́ nṝ́m̐ḥ pā́traṃ devayatā́ṃ śrávad gíro áṅgirasāṃ turaṇyán |
1.121.01c prá yád ā́naḍ víśa ā́ harmyásyorú kraṃsate adhvaré yájatraḥ ‖
1.121.02a stámbhīd dha dyā́ṃ sá dharúṇam pruṣāyad ṛbhúr vā́jāya dráviṇaṃ náro góḥ |
1.121.02c ánu svajā́m mahiṣáś cakṣata vrā́m ménām áśvasya pári mātáraṃ góḥ ‖
1.121.03a nákṣad dhávam aruṇī́ḥ pūrvyáṃ rā́ṭ turó viśā́m áṅgirasām ánu dyū́n |
1.121.03c tákṣad vájraṃ níyutaṃ tastámbhad dyā́ṃ cátuṣpade náryāya dvipā́de ‖
1.121.04a asyá máde svaryàṃ dā ṛtā́yā́pīvṛtam usríyāṇām ánīkam |
1.121.04c yád dha prasárge trikakúṃ nivártad ápa drúho mā́nuṣasya dúro vaḥ ‖
1.121.05a túbhyam páyo yát pitárāv ánītāṃ rā́dhaḥ surétas turáṇe bhuraṇyū́ |
1.121.05c śúci yát te rékṇa ā́yajanta sabardúghāyāḥ páya usríyāyāḥ ‖
1.121.06a ádha prá jajñe taráṇir mamattu prá rocy asyā́ uṣáso ná sū́raḥ |
1.121.06c índur yébhir ā́ṣṭa svéduhavyaiḥ sruvéṇa siñcáñ jaráṇābhí dhā́ma ‖
1.121.07a svidhmā́ yád vanádhitir apasyā́t sū́ro adhvaré pári ródhanā góḥ |
1.121.07c yád dha prabhā́si kṛ́tvyām̐ ánu dyū́n ánarviśe paśvíṣe turā́ya ‖
1.121.08a aṣṭā́ mahó divá ā́do hárī ihá dyumnāsā́ham abhí yodhāná útsam |
1.121.08c háriṃ yát te mandínaṃ dukṣán vṛdhé górabhasam ádribhir vātā́pyam ‖
1.121.09a tvám āyasám práti vartayo gór divó áśmānam úpanītam ṛ́bhvā |
1.121.09c kútsāya yátra puruhūta vanváñ chúṣṇam anantaíḥ pariyā́si vadhaíḥ ‖
1.121.10a purā́ yát sū́ras támaso ápītes tám adrivaḥ phaligáṃ hetím asya |
1.121.10c śúṣṇasya cit párihitaṃ yád ójo divás pári súgrathitaṃ tád ā́daḥ ‖
1.121.11a ánu tvā mahī́ pā́jasī acakré dyā́vākṣā́mā madatām indra kárman |
1.121.11c tváṃ vṛtrám āśáyānaṃ sirā́su mahó vájreṇa siṣvapo varā́hum ‖
1.121.12a tvám indra náryo yā́m̐ ávo nṝ́n tíṣṭhā vā́tasya suyújo váhiṣṭhān |
1.121.12c yáṃ te kāvyá uśánā mandínaṃ dā́d vṛtraháṇam pā́ryaṃ tatakṣa vájram ‖
1.121.13a tváṃ sū́ro haríto rāmayo nṝ́n bhárac cakrám étaśo nā́yám indra |
1.121.13c prā́sya pāráṃ navatíṃ nāvy/nām ápi kartám avartayó 'yajyūn ‖
1.121.14a tváṃ no asyā́ indra durháṇāyāḥ pāhí vajrivo duritā́d abhī́ke |
1.121.14c prá no vā́jān rathyò áśvabudhyān iṣé yandhi śrávase sūnṛ́tāyai ‖
1.121.15a mā́ sā́ te asmát sumatír ví dasad vā́japramahaḥ sám íṣo varanta |
1.121.15c ā́ no bhaja maghavan góṣv aryó máṃhiṣṭhās te sadhamā́daḥ syāma ‖
1.122.01a prá vaḥ pā́ntaṃ raghumanyavó 'ndho yajñáṃ rudrā́ya mīḻhúṣe bharadhvam |
1.122.01c divó astoṣy ásurasya vīraír iṣudhyéva marúto ródasyoḥ ‖
1.122.02a pátnīva pūrváhūtiṃ vāvṛdhádhyā uṣā́sānáktā purudhā́ vídāne |
1.122.02c starī́r nā́tkaṃ vyótaṃ vásānā sū́ryasya śriyā́ sudṛ́śī híraṇyaiḥ ‖
1.122.03a mamáttu naḥ párijmā vasarhā́ mamáttu vā́to apā́ṃ vṛ́ṣaṇvān |
1.122.03c śiśītám indrāparvatā yuváṃ nas tán no víśve varivasyantu devā́ḥ ‖
1.122.04a utá tyā́ me yaśásā śvetanā́yai vyántā pā́ntauśijó huvádhyai |
1.122.04c prá vo nápātam apā́ṃ kṛṇudhvam prá mātárā rāspinásyāyóḥ ‖
1.122.05a ā́ vo ruvaṇyúm auśijó huvádhyai ghóṣeva śáṃsam árjunasya náṃśe |
1.122.05c prá vaḥ pūṣṇé dāvána ā́m̐ áchā voceya vasútātim agnéḥ ‖