1.001.01a agním īḻe puróhitaṃ yajñásya devám ṛtvíjam - Linguistics

1.046.14a yuvór uṣā́ ánu śríyam párijmanor upā́carat |
1.046.14c ṛtā́ vanatho aktúbhiḥ ‖
1.046.15a ubhā́ pibatam aśvinobhā́ naḥ śárma yachatam |
1.046.15c avidriyā́bhir ūtíbhiḥ ‖
1.047.01a ayáṃ vām mádhumattamaḥ sutáḥ sóma ṛtāvṛdhā |
1.047.01c tám aśvinā pibataṃ tiróahnyaṃ dhattáṃ rátnāni dāśúṣe ‖
1.047.02a trivandhuréṇa trivṛ́tā supéśasā ráthenā́ yātam aśvinā |
1.047.02c káṇvāso vām bráhma kṛṇvanty adhvaré téṣāṃ sú śṛṇutaṃ hávam ‖
1.047.03a áśvinā mádhumattamam pātáṃ sómam ṛtāvṛdhā |
1.047.03c áthādyá dasrā vásu bíbhratā ráthe dāśvā́ṃsam úpa gachatam ‖
1.047.04a triṣadhasthé barhíṣi viśvavedasā mádhvā yajñám mimikṣatam |
1.047.04c káṇvāso vāṃ sutásomā abhídyavo yuvā́ṃ havante aśvinā ‖
1.047.05a yā́bhiḥ káṇvam abhíṣṭibhiḥ prā́vataṃ yuvám aśvinā |
1.047.05c tā́bhiḥ ṣv àsmā́m̐ avataṃ śubhas patī pātáṃ sómam ṛtāvṛdhā ‖
1.047.06a sudā́se dasrā vásu bíbhratā ráthe pṛ́kṣo vahatam aśvinā |
1.047.06c rayíṃ samudrā́d utá vā divás páry asmé dhattam puruspṛ́ham ‖
1.047.07a yán nāsatyā parāváti yád vā sthó ádhi turváśe |
1.047.07c áto ráthena suvṛ́tā na ā́ gataṃ sākáṃ sū́ryasya raśmíbhiḥ ‖
1.047.08a arvā́ñcā vāṃ sáptayo 'dhvaraśríyo váhantu sávanéd úpa |
1.047.08c íṣam pṛñcántā sukṛ́te sudā́nava ā́ barhíḥ sīdataṃ narā ‖
1.047.09a téna nāsatyā́ gataṃ ráthena sū́ryatvacā |
1.047.09c yéna śáśvad ūháthur dāśúṣe vásu mádhvaḥ sómasya pītáye ‖
1.047.10a ukthébhir arvā́g ávase purūvásū arkaíś ca ní hvayāmahe |
1.047.10c śáśvat káṇvānāṃ sádasi priyé hí kaṃ sómam papáthur aśvinā ‖
1.048.01a sahá vāména na uṣo vy ùchā duhitar divaḥ |
1.048.01c sahá dyumnéna bṛhatā́ vibhāvari rāyā́ devi dā́svatī ‖
1.048.02a áśvāvatīr gómatīr viśvasuvído bhū́ri cyavanta vástave |
1.048.02c úd īraya práti mā sūnṛ́tā uṣaś códa rā́dho maghónām ‖
1.048.03a uvā́soṣā́ uchā́c ca nú devī́ jīrā́ ráthānām |
1.048.03c yé asyā ācáraṇeṣu dadhriré samudré ná śravasyávaḥ ‖
1.048.04a úṣo yé te prá yā́meṣu yuñjáte máno dānā́ya sūráyaḥ |
1.048.04c átrā́ha tát káṇva eṣāṃ káṇvatamo nā́ma gṛṇāti nṛṇā́m ‖
1.048.05a ā́ ghā yóṣeva sūnáry uṣā́ yāti prabhuñjatī́ |
1.048.05c jaráyantī vṛ́janam padvád īyata út pātayati pakṣíṇaḥ ‖
1.048.06a ví yā́ sṛjáti sámanaṃ vy àrthínaḥ padáṃ ná vety ódatī |
1.048.06c váyo nákiṣ ṭe paptivā́ṃsa āsate vyóṣṭau vājinīvati ‖
1.048.07a eṣā́yukta parāvátaḥ sū́ryasyodáyanād ádhi |
1.048.07c śatáṃ ráthebhiḥ subhágoṣā́ iyáṃ ví yāty abhí mā́nuṣān ‖
1.048.08a víśvam asyā nānāma cákṣase jágaj jyótiṣ kṛṇoti sūnárī |
1.048.08c ápa dvéṣo maghónī duhitā́ divá uṣā́ uchad ápa srídhaḥ ‖
1.048.09a úṣa ā́ bhāhi bhānúnā candréṇa duhitar divaḥ |
1.048.09c āváhantī bhū́ry asmábhyaṃ saúbhagaṃ vyuchántī díviṣṭiṣu ‖
1.048.10a víśvasya hí prā́ṇanaṃ jī́vanaṃ tvé ví yád uchási sūnari |