1.001.01a agním īḻe puróhitaṃ yajñásya devám ṛtvíjam - Linguistics

1.091.19c gayasphā́naḥ pratáraṇaḥ suvī́ró 'vīrahā prá carā soma dúryān ‖
1.091.20a sómo dhenúṃ sómo árvantam āśúṃ sómo vīráṃ karmaṇyàṃ dadāti |
1.091.20c sādanyàṃ vidathyàṃ sabhéyam pitṛśrávaṇaṃ yó dádāśad asmai ‖
1.091.21a áṣāḻhaṃ yutsú pṛ́tanāsu pápriṃ svarṣā́m apsā́ṃ vṛjánasya gopā́m |
1.091.21c bhareṣujā́ṃ sukṣitíṃ suśrávasaṃ jáyantaṃ tvā́m ánu madema soma ‖
1.091.22a tvám imā́ óṣadhīḥ soma víśvās tvám apó ajanayas tváṃ gā́ḥ |
1.091.22c tvám ā́ tatanthorv àntárikṣaṃ tváṃ jyótiṣā ví támo vavartha ‖
1.091.23a devéna no mánasā deva soma rāyó bhāgáṃ sahasāvann abhí yudhya |
1.091.23c mā́ tvā́ tanad ī́śiṣe vīryàsyobháyebhyaḥ prá cikitsā gáviṣṭau ‖
1.092.01a etā́ u tyā́ uṣásaḥ ketúm akrata pū́rve árdhe rájaso bhānúm añjate |
1.092.01c niṣkṛṇvānā́ ā́yudhānīva dhṛṣṇávaḥ práti gā́vó 'ruṣīr yanti mātáraḥ ‖
1.092.02a úd apaptann aruṇā́ bhānávo vṛ́thā svāyújo áruṣīr gā́ ayukṣata |
1.092.02c ákrann uṣā́so vayúnāni pūrváthā rúśantam bhānúm áruṣīr aśiśrayuḥ ‖
1.092.03a árcanti nā́rīr apáso ná viṣṭíbhiḥ samānéna yójanenā́ parāvátaḥ |
1.092.03c íṣaṃ váhantīḥ sukṛ́te sudā́nave víśvéd áha yájamānāya sunvaté ‖
1.092.04a ádhi péśāṃsi vapate nṛtū́r ivā́porṇute vákṣa usréva bárjaham |
1.092.04c jyótir víśvasmai bhúvanāya kṛṇvatī́ gā́vo ná vrajáṃ vy ùṣā́ āvar támaḥ ‖
1.092.05a práty arcī́ rúśad asyā adarśi ví tiṣṭhate bā́dhate kṛṣṇám ábhvam |
1.092.05c sváruṃ ná péśo vidátheṣv añjáñ citráṃ divó duhitā́ bhānúm aśret ‖
1.092.06a átāriṣma támasas pārám asyóṣā́ uchántī vayúnā kṛṇoti |
1.092.06c śriyé chándo ná smayate vibhātī́ suprátīkā saumanasā́yājīgaḥ ‖
1.092.07a bhā́svatī netrī́ sūnṛ́tānāṃ divá stave duhitā́ gótamebhiḥ |
1.092.07c prajā́vato nṛváto áśvabudhyān úṣo góagrām̐ úpa māsi vā́jān ‖
1.092.08a úṣas tám aśyāṃ yaśásaṃ suvī́raṃ dāsápravargaṃ rayím áśvabudhyam |
1.092.08c sudáṃsasā śrávasā yā́ vibhā́si vā́japrasūtā subhage bṛhántam ‖
1.092.09a víśvāni devī́ bhúvanābhicákṣyā pratīcī́ cákṣur urviyā́ ví bhāti |
1.092.09c víśvaṃ jīváṃ caráse bodháyantī víśvasya vā́cam avidan manāyóḥ ‖
1.092.10a púnaḥ-punar jā́yamānā purāṇī́ samānáṃ várṇam abhí śúmbhamānā |
1.092.10c śvaghnī́va kṛtnúr víja āminānā́ mártasya devī́ jaráyanty ā́yuḥ ‖
1.092.11a vyūrṇvatī́ divó ántām̐ abodhy ápa svásāraṃ sanutár yuyoti |
1.092.11c praminatī́ manuṣy/ yugā́ni yóṣā jārásya cákṣasā ví bhāti ‖
1.092.12a paśū́n ná citrā́ subhágā prathānā́ síndhur ná kṣóda urviyā́ vy àśvait |
1.092.12c áminatī daívyāni vratā́ni sū́ryasya ceti raśmíbhir dṛśānā́ ‖
1.092.13a úṣas tác citrám ā́ bharāsmábhyaṃ vājinīvati |
1.092.13c yéna tokáṃ ca tánayaṃ ca dhā́mahe ‖
1.092.14a úṣo adyéhá gomaty áśvāvati vibhāvari |
1.092.14c revád asmé vy ùcha sūnṛtāvati ‖
1.092.15a yukṣvā́ hí vājinīvaty áśvām̐ adyā́ruṇā́m̐ uṣaḥ |
1.092.15c áthā no víśvā saúbhagāny ā́ vaha ‖
1.092.16a áśvinā vartír asmád ā́ gómad dasrā híraṇyavat |
1.092.16c arvā́g ráthaṃ sámanasā ní yachatam ‖
1.092.17a yā́v itthā́ ślókam ā́ divó jyótir jánāya cakráthuḥ |
1.092.17c ā́ na ū́rjaṃ vahatam aśvinā yuvám ‖
1.092.18a éhá devā́ mayobhúvā dasrā́ híraṇyavartanī |