1.001.01a agním īḻe puróhitaṃ yajñásya devám ṛtvíjam - Linguistics

1.117.17a śatám meṣā́n vṛkyè māmahānáṃ támaḥ práṇītam áśivena pitrā́ |
1.117.17c ā́kṣī́ ṛjrā́śve aśvināv adhattaṃ jyótir andhā́ya cakrathur vicákṣe ‖
1.117.18a śunám andhā́ya bháram ahvayat sā́ vṛkī́r aśvinā vṛṣaṇā náréti |
1.117.18c jāráḥ kanī́na iva cakṣadāná ṛjrā́śvaḥ śatám ékaṃ ca meṣā́n ‖
1.117.19a mahī́ vām ūtír aśvinā mayobhū́r utá srāmáṃ dhiṣṇyā sáṃ riṇīthaḥ |
1.117.19c áthā yuvā́m íd ahvayat púraṃdhir ā́gachataṃ sīṃ vṛṣaṇāv ávobhiḥ ‖
1.117.20a ádhenuṃ dasrā staryàṃ víṣaktām ápinvataṃ śayáve aśvinā gā́m |
1.117.20c yuváṃ śácībhir vimadā́ya jāyā́ṃ ny 2hathuḥ purumitrásya yóṣām ‖
1.117.21a yávaṃ vṛ́keṇāśvinā vápantéṣaṃ duhántā mánuṣāya dasrā |
1.117.21c abhí dásyum bákureṇā dhámantorú jyótiś cakrathur ā́ryāya ‖
1.117.22a ātharvaṇā́yāśvinā dadhīcé 'śvyaṃ śíraḥ práty airayatam |
1.117.22c sá vām mádhu prá vocad ṛtāyán tvāṣṭráṃ yád dasrāv apikakṣyàṃ vām ‖
1.117.23a sádā kavī sumatím ā́ cake vāṃ víśvā dhíyo aśvinā prā́vatam me |
1.117.23c asmé rayíṃ nāsatyā bṛhántam apatyasā́caṃ śrútyaṃ rarāthām ‖
1.117.24a híraṇyahastam aśvinā rárāṇā putráṃ narā vadhrimatyā́ adattam |
1.117.24c trídhā ha śyā́vam aśvinā víkastam új jīvása airayataṃ sudānū ‖
1.117.25a etā́ni vām aśvinā vīry/ṇi prá pūrvyā́ṇy āyávo 'vocan |
1.117.25c bráhma kṛṇvánto vṛṣaṇā yuvábhyāṃ suvī́rāso vidátham ā́ vadema ‖
1.118.01a ā́ vāṃ rátho aśvinā śyenápatvā sumṛḻīkáḥ svávām̐ yātv arvā́ṅ |
1.118.01c yó mártyasya mánaso jávīyān trivandhuró vṛṣaṇā vā́taraṃhāḥ ‖
1.118.02a trivandhuréṇa trivṛ́tā ráthena tricakréṇa suvṛ́tā́ yātam arvā́k |
1.118.02c pínvataṃ gā́ jínvatam árvato no vardháyatam aśvinā vīrám asmé ‖
1.118.03a pravádyāmanā suvṛ́tā ráthena dásrāv imáṃ śṛṇutaṃ ślókam ádreḥ |
1.118.03c kím aṅgá vām práty ávartiṃ gámiṣṭhāhúr víprāso aśvinā purājā́ḥ ‖
1.118.04a ā́ vāṃ śyenā́so aśvinā vahantu ráthe yuktā́sa āśávaḥ pataṃgā́ḥ |
1.118.04c yé aptúro divyā́so ná gṛ́dhrā abhí práyo nāsatyā váhanti ‖
1.118.05a ā́ vāṃ ráthaṃ yuvatís tiṣṭhad átra juṣṭvī́ narā duhitā́ sū́ryasya |
1.118.05c pári vām áśvā vápuṣaḥ pataṃgā́ váyo vahantv aruṣā́ abhī́ke ‖
1.118.06a úd vándanam airataṃ daṃsánābhir úd rebháṃ dasrā vṛṣaṇā śácībhiḥ |
1.118.06c níṣ ṭaugryám pārayathaḥ samudrā́t púnaś cyávānaṃ cakrathur yúvānam ‖
1.118.07a yuvám átrayé 'vanītāya taptám ū́rjam omā́nam aśvināv adhattam |
1.118.07c yuváṃ káṇvāyā́piriptāya cákṣuḥ práty adhattaṃ suṣṭutíṃ jujuṣāṇā́ ‖
1.118.08a yuváṃ dhenúṃ śayáve nādhitā́yā́pinvatam aśvinā pūrvyā́ya |
1.118.08c ámuñcataṃ vártikām áṃhaso níḥ práti jáṅghāṃ viśpálāyā adhattam ‖
1.118.09a yuváṃ śvetám pedáva índrajūtam ahihánam aśvinādattam áśvam |
1.118.09c johū́tram aryó abhíbhūtim ugráṃ sahasrasā́ṃ vṛ́ṣaṇaṃ vīḍvàṅgam ‖
1.118.10a tā́ vāṃ narā sv ávase sujātā́ hávāmahe aśvinā nā́dhamānāḥ |
1.118.10c ā́ na úpa vásumatā ráthena gíro juṣāṇā́ suvitā́ya yātam ‖
1.118.11a ā́ śyenásya jávasā nū́tanenāsmé yātaṃ nāsatyā sajóṣāḥ |
1.118.11c háve hí vām aśvinā rātáhavyaḥ śaśvattamā́yā uṣáso vyóṣṭau ‖
1.119.01a ā́ vāṃ rátham purumāyám manojúvaṃ jīrā́śvaṃ yajñíyaṃ jīváse huve |
1.119.01c sahásraketuṃ vanínaṃ śatádvasuṃ śruṣṭīvā́naṃ varivodhā́m abhí práyaḥ ‖