1.001.01a agním īḻe puróhitaṃ yajñásya devám ṛtvíjam - Linguistics

1.014.09a ā́kīṃ sū́ryasya rocanā́d víśvān devā́m̐ uṣarbúdhaḥ |
1.014.09c vípro hótehá vakṣati ‖
1.014.10a víśvebhiḥ somyám mádhv ágna índreṇa vāyúnā |
1.014.10c píbā mitrásya dhā́mabhiḥ ‖
1.014.11a tváṃ hótā mánurhitó 'gne yajñéṣu sīdasi |
1.014.11c sémáṃ no adhvaráṃ yaja ‖
1.014.12a yukṣvā́ hy áruṣī ráthe haríto deva rohítaḥ |
1.014.12c tā́bhir devā́m̐ ihā́ vaha ‖
1.015.01a índra sómam píba ṛtúnā́ tvā viśantv índavaḥ |
1.015.01c matsarā́sas tádokasaḥ ‖
1.015.02a márutaḥ píbata ṛtúnā potrā́d yajñám punītana |
1.015.02c yūyáṃ hí ṣṭhā́ sudānavaḥ ‖
1.015.03a abhí yajñáṃ gṛṇīhi no gnā́vo néṣṭaḥ píba ṛtúnā |
1.015.03c tváṃ hí ratnadhā́ ási ‖
1.015.04a ágne devā́m̐ ihā́ vaha sādáyā yóniṣu triṣú |
1.015.04c pári bhūṣa píba ṛtúnā ‖
1.015.05a brā́hmaṇād indra rā́dhasaḥ píbā sómam ṛtū́m̐r ánu |
1.015.05c távéd dhí sakhyám ástṛtam ‖
1.015.06a yuváṃ dákṣaṃ dhṛtavrata mítrāvaruṇa dūḻábham |
1.015.06c ṛtúnā yajñám āśāthe ‖
1.015.07a draviṇodā́ dráviṇaso grā́vahastāso adhvaré |
1.015.07c yajñéṣu devám īḻate ‖
1.015.08a draviṇodā́ dadātu no vásūni yā́ni śṛṇviré |
1.015.08c devéṣu tā́ vanāmahe ‖
1.015.09a draviṇodā́ḥ pipīṣati juhóta prá ca tiṣṭhata |
1.015.09c neṣṭrā́d ṛtúbhir iṣyata ‖
1.015.10a yát tvā turī́yam ṛtúbhir dráviṇodo yájāmahe |
1.015.10c ádha smā no dadír bhava ‖
1.015.11a áśvinā píbatam mádhu dī́dyagnī śucivratā |
1.015.11c ṛtúnā yajñavāhasā ‖
1.015.12a gā́rhapatyena santya ṛtúnā yajñanī́r asi |
1.015.12c devā́n devayaté yaja ‖
1.016.01a ā́ tvā vahantu hárayo vṛ́ṣaṇaṃ sómapītaye |
1.016.01c índra tvā sū́racakṣasaḥ ‖
1.016.02a imā́ dhānā́ ghṛtasnúvo hárī ihópa vakṣataḥ |
1.016.02c índraṃ sukhátame ráthe ‖
1.016.03a índram prātár havāmaha índram prayaty àdhvaré |
1.016.03c índraṃ sómasya pītáye ‖
1.016.04a úpa naḥ sutám ā́ gahi háribhir indra keśíbhiḥ |
1.016.04c suté hí tvā hávāmahe ‖
1.016.05a sémáṃ na stómam ā́ gahy úpedáṃ sávanaṃ sutám |