1.001.01a agním īḻe puróhitaṃ yajñásya devám ṛtvíjam - Linguistics

1.036.10c yáṃ káṇvo médhyātithir dhanaspṛ́taṃ yáṃ vṛ́ṣā yám upastutáḥ ‖
1.036.11a yám agním médhyātithiḥ káṇva īdhá ṛtā́d ádhi |
1.036.11c tásya préṣo dīdiyus tám imā́ ṛ́cas tám agníṃ vardhayāmasi ‖
1.036.12a rāyás pūrdhi svadhāvó 'sti hí té 'gne devéṣv ā́pyam |
1.036.12c tváṃ vā́jasya śrútyasya rājasi sá no mṛḻa mahā́m̐ asi ‖
1.036.13a ūrdhvá ū ṣú ṇa ūtáye tíṣṭhā devó ná savitā́ |
1.036.13c ūrdhvó vā́jasya sánitā yád añjíbhir vāghádbhir vihváyāmahe ‖
1.036.14a ūrdhvó naḥ pāhy áṃhaso ní ketúnā víśvaṃ sám atríṇaṃ daha |
1.036.14c kṛdhī́ na ūrdhvā́ñ caráthāya jīváse vidā́ devéṣu no dúvaḥ ‖
1.036.15a pāhí no agne rakṣásaḥ pāhí dhūrtér árāvṇaḥ |
1.036.15c pāhí rī́ṣata utá vā jíghāṃsato bṛ́hadbhāno yáviṣṭhya ‖
1.036.16a ghanéva víṣvag ví jahy árāvṇas tápurjambha yó asmadhrúk |
1.036.16c yó mártyaḥ śíśīte áty aktúbhir mā́ naḥ sá ripúr īśata ‖
1.036.17a agnír vavne suvī́ryam agníḥ káṇvāya saúbhagam |
1.036.17c agníḥ prā́van mitrótá médhyātithim agníḥ sātā́ upastutám ‖
1.036.18a agnínā turváśaṃ yádum parāváta ugrā́devaṃ havāmahe |
1.036.18c agnír nayan návavāstvam bṛhádrathaṃ turvī́tiṃ dásyave sáhaḥ ‖
1.036.19a ní tvā́m agne mánur dadhe jyótir jánāya śáśvate |
1.036.19c dīdétha káṇva ṛtájāta ukṣitó yáṃ namasyánti kṛṣṭáyaḥ ‖
1.036.20a tveṣā́so agnér ámavanto arcáyo bhīmā́so ná prátītaye |
1.036.20c rakṣasvínaḥ sádam íd yātumā́vato víśvaṃ sám atríṇaṃ daha ‖
1.037.01a krīḻáṃ vaḥ śárdho mā́rutam anarvā́ṇaṃ ratheśúbham |
1.037.01c káṇvā abhí prá gāyata ‖
1.037.02a yé pṛ́ṣatībhir ṛṣṭíbhiḥ sākáṃ vā́śībhir añjíbhiḥ |
1.037.02c ájāyanta svábhānavaḥ ‖
1.037.03a ihéva śṛṇva eṣāṃ káśā hásteṣu yád vádān |
1.037.03c ní yā́mañ citrám ṛñjate ‖
1.037.04a prá vaḥ śárdhāya ghṛ́ṣvaye tveṣádyumnāya śuṣmíṇe |
1.037.04c deváttam bráhma gāyata ‖
1.037.05a prá śaṃsā góṣv ághnyaṃ krīḻáṃ yác chárdho mā́rutam |
1.037.05c jámbhe rásasya vāvṛdhe ‖
1.037.06a kó vo várṣiṣṭha ā́ naro diváś ca gmáś ca dhūtayaḥ |
1.037.06c yát sīm ántaṃ ná dhūnuthá ‖
1.037.07a ní vo yā́māya mā́nuṣo dadhrá ugrā́ya manyáve |
1.037.07c jíhīta párvato giríḥ ‖
1.037.08a yéṣām ájmeṣu pṛthivī́ jujurvā́m̐ iva viśpátiḥ |
1.037.08c bhiyā́ yā́meṣu réjate ‖
1.037.09a sthiráṃ hí jā́nam eṣāṃ váyo mātúr níretave |
1.037.09c yát sīm ánu dvitā́ śávaḥ ‖
1.037.10a úd u tyé sūnávo gíraḥ kā́ṣṭhā ájmeṣv atnata |
1.037.10c vāśrā́ abhijñú yā́tave ‖
1.037.11a tyáṃ cid ghā dīrghám pṛthúm mihó nápātam ámṛdhram |
1.037.11c prá cyāvayanti yā́mabhiḥ ‖
1.037.12a máruto yád dha vo bálaṃ jánām̐ acucyavītana |