1.001.01a agním īḻe puróhitaṃ yajñásya devám ṛtvíjam - Linguistics

1.007.01c índraṃ vā́ṇīr anūṣata ‖
1.007.02a índra íd dháryoḥ sácā sámmiśla ā́ vacoyújā |
1.007.02c índro vajrī́ hiraṇyáyaḥ ‖
1.007.03a índro dīrghā́ya cákṣasa ā́ sū́ryaṃ rohayad diví |
1.007.03c ví góbhir ádrim airayat ‖
1.007.04a índra vā́jeṣu no 'va sahásrapradhaneṣu ca |
1.007.04c ugrá ugrā́bhir ūtíbhiḥ ‖
1.007.05a índraṃ vayám mahādhaná índram árbhe havāmahe |
1.007.05c yújaṃ vṛtréṣu vajríṇam ‖
1.007.06a sá no vṛṣann amúṃ carúṃ sátrādāvann ápā vṛdhi |
1.007.06c asmábhyam ápratiṣkutaḥ ‖
1.007.07a tuñjé-tuñje yá úttare stómā índrasya vajríṇaḥ |
1.007.07c ná vindhe asya suṣṭutím ‖
1.007.08a vṛ́ṣā yūthéva váṃsagaḥ kṛṣṭī́r iyarty ójasā |
1.007.08c ī́śāno ápratiṣkutaḥ ‖
1.007.09a yá ékaś carṣaṇīnā́ṃ vásūnām irajyáti |
1.007.09c índraḥ páñca kṣitīnā́m ‖
1.007.10a índraṃ vo viśvátas pári hávāmahe jánebhyaḥ |
1.007.10c asmā́kam astu kévalaḥ ‖
1.008.01a éndra sānasíṃ rayíṃ sajítvānaṃ sadāsáham |
1.008.01c várṣiṣṭham ūtáye bhara ‖
1.008.02a ní yéna muṣṭihatyáyā ní vṛtrā́ ruṇádhāmahai |
1.008.02c tvótāso ny árvatā ‖
1.008.03a índra tvótāsa ā́ vayáṃ vájraṃ ghanā́ dadīmahi |
1.008.03c jáyema sáṃ yudhí spṛ́dhaḥ ‖
1.008.04a vayáṃ śū́rebhir ástṛbhir índra tváyā yujā́ vayám |
1.008.04c sāsahyā́ma pṛtanyatáḥ ‖
1.008.05a mahā́m̐ índraḥ paráś ca nú mahitvám astu vajríṇe |
1.008.05c dyaúr ná prathinā́ śávaḥ ‖
1.008.06a samohé vā yá ā́śata náras tokásya sánitau |
1.008.06c víprāso vā dhiyāyávaḥ ‖
1.008.07a yáḥ kukṣíḥ somapā́tamaḥ samudrá iva pínvate |
1.008.07c urvī́r ā́po ná kākúdaḥ ‖
1.008.08a evā́ hy àsya sūnṛ́tā virapśī́ gómatī mahī́ |
1.008.08c pakvā́ śā́khā ná dāśúṣe ‖
1.008.09a evā́ hí te víbhūtaya ūtáya indra mā́vate |
1.008.09c sadyáś cit sánti dāśúṣe ‖
1.008.10a evā́ hy àsya kā́myā stóma uktháṃ ca śáṃsyā |
1.008.10c índrāya sómapītaye ‖
1.009.01a índréhi mátsy ándhaso víśvebhiḥ somapárvabhiḥ |
1.009.01c mahā́m̐ abhiṣṭír ójasā ‖