1.001.01a agním īḻe puróhitaṃ yajñásya devám ṛtvíjam - Linguistics

1.172.01a citró vo 'stu yā́maś citrá ūtī́ sudānavaḥ |
1.172.01c máruto áhibhānavaḥ ‖
1.172.02a āré sā́ vaḥ sudānavo máruta ṛñjatī́ śáruḥ |
1.172.02c āré áśmā yám ásyatha ‖
1.172.03a tṛṇaskandásya nú víśaḥ pári vṛṅkta sudānavaḥ |
1.172.03c ūrdhvā́n naḥ karta jīváse ‖
1.173.01a gā́yat sā́ma nabhanyàṃ yáthā vér árcāma tád vāvṛdhānáṃ svàrvat |
1.173.01c gā́vo dhenávo barhíṣy ádabdhā ā́ yát sadmā́naṃ divyáṃ vívāsān ‖
1.173.02a árcad vṛ́ṣā vṛ́ṣabhiḥ svéduhavyair mṛgó nā́śno áti yáj juguryā́t |
1.173.02c prá mandayúr manā́ṃ gūrta hótā bhárate máryo mithunā́ yájatraḥ ‖
1.173.03a nákṣad dhótā pári sádma mitā́ yán bhárad gárbham ā́ śarádaḥ pṛthivyā́ḥ |
1.173.03c krándad áśvo náyamāno ruvád gaúr antár dūtó ná ródasī carad vā́k ‖
1.173.04a tā́ karmā́ṣatarāsmai prá cyautnā́ni devayánto bharante |
1.173.04c jújoṣad índro dasmávarcā nā́satyeva súgmyo ratheṣṭhā́ḥ ‖
1.173.05a tám u ṣṭuhī́ndraṃ yó ha sátvā yáḥ śū́ro maghávā yó ratheṣṭhā́ḥ |
1.173.05c pratīcáś cid yódhīyān vṛ́ṣaṇvān vavavrúṣaś cit támaso vihantā́ ‖
1.173.06a prá yád itthā́ mahinā́ nṛ́bhyo ásty áraṃ ródasī kakṣyè nā́smai |
1.173.06c sáṃ vivya índro vṛjánaṃ ná bhū́mā bhárti svadhā́vām̐ opaśám iva dyā́m ‖
1.173.07a samátsu tvā śūra satā́m urāṇám prapathíntamam paritaṃsayádhyai |
1.173.07c sajóṣasa índram máde kṣoṇī́ḥ sūríṃ cid yé anumádanti vā́jaiḥ ‖
1.173.08a evā́ hí te śáṃ sávanā samudrá ā́po yát ta āsú mádanti devī́ḥ |
1.173.08c víśvā te ánu jóṣyā bhūd gaúḥ sūrī́ṃś cid yádi dhiṣā́ véṣi jánān ‖
1.173.09a ásāma yáthā suṣakhā́ya ena svabhiṣṭáyo narā́ṃ ná śáṃsaiḥ |
1.173.09c ásad yáthā na índro vandaneṣṭhā́s turó ná kárma náyamāna ukthā́ ‖
1.173.10a víṣpardhaso narā́ṃ ná śáṃsair asmā́kāsad índro vájrahastaḥ |
1.173.10c mitrāyúvo ná pū́rpatiṃ súśiṣṭau madhyāyúva úpa śikṣanti yajñaíḥ ‖
1.173.11a yajñó hí ṣméndraṃ káś cid ṛndháñ juhurāṇáś cin mánasā pariyán |
1.173.11c tīrthé nā́chā tātṛṣāṇám óko dīrghó ná sidhrám ā́ kṛṇoty ádhvā ‖
1.173.12a mó ṣū́ ṇa indrā́tra pṛtsú devaír ásti hí ṣmā te śuṣminn avayā́ḥ |
1.173.12c maháś cid yásya mīḻhúṣo yavyā́ havíṣmato marúto vándate gī́ḥ ‖
1.173.13a eṣá stóma indra túbhyam asmé eténa gātúṃ harivo vido naḥ |
1.173.13c ā́ no vavṛtyāḥ suvitā́ya deva vidyā́meṣáṃ vṛjánaṃ jīrádānum ‖
1.174.01a tváṃ rā́jendra yé ca devā́ rákṣā nṝ́n pāhy àsura tvám asmā́n |
1.174.01c tváṃ sátpatir maghávā nas tárutras tváṃ satyó vásavānaḥ sahodā́ḥ ‖
1.174.02a dáno víśa indra mṛdhrávācaḥ saptá yát púraḥ śárma śā́radīr dárt |
1.174.02c ṛṇór apó anavadyā́rṇā yū́ne vṛtrám purukútsāya randhīḥ ‖
1.174.03a ájā vṛ́ta indra śū́rapatnīr dyā́ṃ ca yébhiḥ puruhūta nūnám |
1.174.03c rákṣo agním aśúṣaṃ tū́rvayāṇaṃ siṃhó ná dáme ápāṃsi vástoḥ ‖
1.174.04a śéṣan nú tá indra sásmin yónau práśastaye pávīravasya mahnā́ |
1.174.04c sṛjád árṇāṃsy áva yád yudhā́ gā́s tíṣṭhad dhárī dhṛṣatā́ mṛṣṭa vā́jān ‖
1.174.05a váha kútsam indra yásmiñ cākán syūmanyū́ ṛjrā́ vā́tasyā́śvā |
1.174.05c prá sū́raś cakráṃ vṛhatād abhī́ke 'bhí spṛ́dho yāsiṣad vájrabāhuḥ ‖