1.001.01a agním īḻe puróhitaṃ yajñásya devám ṛtvíjam - Linguistics

1.137.02a imá ā́ yātam índavaḥ sómāso dádhyāśiraḥ sutā́so dádhyāśiraḥ |
1.137.02d utá vām uṣáso budhí sākáṃ sū́ryasya raśmíbhiḥ |
1.137.02f sutó mitrā́ya váruṇāya pītáye cā́rur ṛtā́ya pītáye ‖
1.137.03a tā́ṃ vāṃ dhenúṃ ná vāsarī́m aṃśúṃ duhanty ádribhiḥ sómaṃ duhanty ádribhiḥ |
1.137.03d asmatrā́ gantam úpa no 'rvā́ñcā sómapītaye |
1.137.03f ayáṃ vām mitrāvaruṇā nṛ́bhiḥ sutáḥ sóma ā́ pītáye sutáḥ ‖
1.138.01a prá-pra pūṣṇás tuvijātásya śasyate mahitvám asya taváso ná tandate
stotrám asya ná tandate |
1.138.01d árcāmi sumnayánn ahám ántyūtim mayobhúvam |
1.138.01f víśvasya yó mána āyuyuvé makhó devá āyuyuvé makháḥ ‖
1.138.02a prá hí tvā pūṣann ajiráṃ ná yā́mani stómebhiḥ kṛṇvá ṛṇávo yáthā mṛ́dha
úṣṭro ná pīparo mṛ́dhaḥ |
1.138.02d huvé yát tvā mayobhúvaṃ deváṃ sakhyā́ya mártyaḥ |
1.138.02f asmā́kam āṅgūṣā́n dyumnínas kṛdhi vā́jeṣu dyumnínas kṛdhi ‖
1.138.03a yásya te pūṣan sakhyé vipanyávaḥ krátvā cit sántó 'vasā bubhujrirá íti
krátvā bubhujriré |
1.138.03d tā́m ánu tvā návīyasīṃ niyútaṃ rāyá īmahe |
1.138.03f áheḻamāna uruśaṃsa sárī bhava vā́je-vāje sárī bhava ‖
1.138.04a asyā́ ū ṣú ṇa úpa sātáye bhuvó 'heḻamāno rarivā́m̐ ajāśva śravasyatā́m
ajāśva |
1.138.04d ó ṣú tvā vavṛtīmahi stómebhir dasma sādhúbhiḥ |
1.138.04f nahí tvā pūṣann atimánya āghṛṇe ná te sakhyám apahnuvé ‖
1.139.01a ástu śraúṣaṭ puró agnī́ṃ dhiyā́ dadha ā́ nú tác chárdho divyáṃ vṛṇīmaha
indravāyū́ vṛṇīmahe |
1.139.01d yád dha krāṇā́ vivásvati nā́bhā saṃdā́yi návyasī |
1.139.01f ádha prá sū́ na úpa yantu dhītáyo devā́m̐ áchā ná dhītáyaḥ ‖
1.139.02a yád dha tyán mitrāvaruṇāv ṛtā́d ádhy ādadā́the ánṛtaṃ svéna manyúnā
dákṣasya svéna manyúnā |
1.139.02d yuvór itthā́dhi sádmasv ápaśyāma hiraṇyáyam |
1.139.02f dhībhíś caná mánasā svébhir akṣábhiḥ sómasya svébhir akṣábhiḥ ‖
1.139.03a yuvā́ṃ stómebhir devayánto aśvināśrāváyanta iva ślókam āyávo yuvā́ṃ
havyā́bhy /yávaḥ |
1.139.03d yuvór víśvā ádhi śríyaḥ pṛ́kṣaś ca viśvavedasā |
1.139.03f pruṣāyánte vām paváyo hiraṇyáye ráthe dasrā hiraṇyáye ‖
1.139.04a áceti dasrā vy ù nā́kam ṛṇvatho yuñjáte vāṃ rathayújo díviṣṭiṣv adhvasmā́no
díviṣṭiṣu |
1.139.04d ádhi vāṃ sthā́ma vandhúre ráthe dasrā hiraṇyáye |
1.139.04f pathéva yántāv anuśā́satā rájó 'ñjasā śā́satā rájaḥ ‖
1.139.05a śácībhir naḥ śacīvasū dívā náktaṃ daśasyatam |
1.139.05c mā́ vāṃ rātír úpa dasat kádā canā́smád rātíḥ kádā caná ‖
1.139.06a vṛ́ṣann indra vṛṣapā́ṇāsa índava imé sutā́ ádriṣutāsa udbhídas túbhyaṃ
sutā́sa udbhídaḥ |
1.139.06d té tvā mandantu dāváne mahé citrā́ya rā́dhase |