1.001.01a agním īḻe puróhitaṃ yajñásya devám ṛtvíjam - Linguistics

1.158.01c dásrā ha yád rékṇa aucathyó vām prá yát sasrā́the ákavābhir ūtī́ ‖
1.158.02a kó vāṃ dāśat sumatáye cid asyaí vásū yád dhéthe námasā padé góḥ |
1.158.02c jigṛtám asmé revátīḥ púraṃdhīḥ kāmapréṇeva mánasā cárantā ‖
1.158.03a yuktó ha yád vāṃ taugryā́ya perúr ví mádhye árṇaso dhā́yi pajráḥ |
1.158.03c úpa vām ávaḥ śaraṇáṃ gameyaṃ śū́ro nā́jma patáyadbhir évaiḥ ‖
1.158.04a úpastutir aucathyám uruṣyen mā́ mā́m imé patatríṇī ví dugdhām |
1.158.04c mā́ mā́m édho dáśatayaś citó dhāk prá yád vām baddhás tmáni khā́dati kṣā́m ‖
1.158.05a ná mā garan nadyò mātṛ́tamā dāsā́ yád īṃ súsamubdham avā́dhuḥ |
1.158.05c śíro yád asya traitanó vitákṣat svayáṃ dāsá úro áṃsāv ápi gdha ‖
1.158.06a dīrghátamā māmateyó jujurvā́n daśamé yugé |
1.158.06c apā́m árthaṃ yatī́nām brahmā́ bhavati sā́rathiḥ ‖
1.159.01a prá dyā́vā yajñaíḥ pṛthivī́ ṛtāvṛ́dhā mahī́ stuṣe vidátheṣu prácetasā |
1.159.01c devébhir yé deváputre sudáṃsasetthā́ dhiyā́ vā́ryāṇi prabhū́ṣataḥ ‖
1.159.02a utá manye pitúr adrúho máno mātúr máhi svátavas tád dhávīmabhiḥ |
1.159.02c surétasā pitárā bhū́ma cakratur urú prajā́yā amṛ́taṃ várīmabhiḥ ‖
1.159.03a té sūnávaḥ svápasaḥ sudáṃsaso mahī́ jajñur mātárā pūrvácittaye |
1.159.03c sthātúś ca satyáṃ jágataś ca dhármaṇi putrásya pāthaḥ padám ádvayāvinaḥ ‖
1.159.04a té māyíno mamire suprácetaso jāmī́ sáyonī mithunā́ sámokasā |
1.159.04c návyaṃ-navyaṃ tántum ā́ tanvate diví samudré antáḥ kaváyaḥ sudītáyaḥ ‖
1.159.05a tád rā́dho adyá savitúr váreṇyaṃ vayáṃ devásya prasavé manāmahe |
1.159.05c asmábhyaṃ dyāvāpṛthivī sucetúnā rayíṃ dhattaṃ vásumantaṃ śatagvínam ‖
1.160.01a té hí dyā́vāpṛthivī́ viśváśambhuva ṛtā́varī rájaso dhārayátkavī |
1.160.01c sujánmanī dhiṣáṇe antár īyate devó devī́ dhármaṇā sū́ryaḥ śúciḥ ‖
1.160.02a uruvyácasā mahínī asaścátā pitā́ mātā́ ca bhúvanāni rakṣataḥ |
1.160.02c sudhṛ́ṣṭame vapuṣyè ná ródasī pitā́ yát sīm abhí rūpaír ávāsayat ‖
1.160.03a sá váhniḥ putráḥ pitróḥ pavítravān punā́ti dhī́ro bhúvanāni māyáyā |
1.160.03c dhenúṃ ca pṛ́śniṃ vṛṣabháṃ surétasaṃ viśvā́hā śukrám páyo asya dukṣata ‖
1.160.04a ayáṃ devā́nām apásām apástamo yó jajā́na ródasī viśváśambhuvā |
1.160.04c ví yó mamé rájasī sukratūyáyājárebhi skámbhanebhiḥ sám ānṛce ‖
1.160.05a té no gṛṇāné mahinī máhi śrávaḥ kṣatráṃ dyāvāpṛthivī dhāsatho bṛhát |
1.160.05c yénābhí kṛṣṭī́s tatánāma viśváhā panā́yyam ójo asmé sám invatam ‖
1.161.01a kím u śréṣṭhaḥ kíṃ yáviṣṭho na ā́jagan kím īyate dūtyàṃ kád yád ūcimá |
1.161.01c ná nindima camasáṃ yó mahākuló 'gne bhrātar drúṇa íd bhūtím ūdima ‖
1.161.02a ékaṃ camasáṃ catúraḥ kṛṇotana tád vo devā́ abruvan tád va ā́gamam |
1.161.02c saúdhanvanā yády evā́ kariṣyátha sākáṃ devaír yajñíyāso bhaviṣyatha ‖
1.161.03a agníṃ dūtám práti yád ábravītanā́śvaḥ kártvo rátha utéhá kártvaḥ |
1.161.03c dhenúḥ kártvā yuvaśā́ kártvā dvā́ tā́ni bhrātar ánu vaḥ kṛtvy émasi ‖
1.161.04a cakṛvā́ṃsa ṛbhavas tád apṛchata kvéd abhūd yáḥ syá dūtó na ā́jagan |
1.161.04c yadā́vā́khyac camasā́ñ catúraḥ kṛtā́n ā́d ít tváṣṭā gnā́sv antár ny /naje ‖
1.161.05a hánāmainām̐ íti tváṣṭā yád ábravīc camasáṃ yé devapā́nam ánindiṣuḥ |
1.161.05c anyā́ nā́māni kṛṇvate suté sácām̐ anyaír enān kany/ nā́mabhi sparat ‖