1.001.01a agním īḻe puróhitaṃ yajñásya devám ṛtvíjam - Linguistics

1.088.03c yuṣmábhyaṃ kám marutaḥ sujātās tuvidyumnā́so dhanayante ádrim ‖
1.088.04a áhāni gṛ́dhrāḥ páry ā́ va ā́gur imā́ṃ dhíyaṃ vārkāryā́ṃ ca devī́m |
1.088.04c bráhma kṛṇvánto gótamāso arkaír ūrdhváṃ nunudra utsadhím píbadhyai ‖
1.088.05a etát tyán ná yójanam aceti sasvár ha yán maruto gótamo vaḥ |
1.088.05c páśyan híraṇyacakrān áyodaṃṣṭrān vidhā́vato varā́hūn ‖
1.088.06a eṣā́ syā́ vo maruto 'nubhartrī́ práti ṣṭobhati vāgháto ná vā́ṇī |
1.088.06c ástobhayad vṛ́thāsām ánu svadhā́ṃ gábhastyoḥ ‖
1.089.01a ā́ no bhadrā́ḥ krátavo yantu viśvátó 'dabdhāso áparītāsa udbhídaḥ |
1.089.01c devā́ no yáthā sádam íd vṛdhé ásann áprāyuvo rakṣitā́ro divé-dive ‖
1.089.02a devā́nām bhadrā́ sumatír ṛjūyatā́ṃ devā́nāṃ rātír abhí no ní vartatām |
1.089.02c devā́nāṃ sakhyám úpa sedimā vayáṃ devā́ na ā́yuḥ prá tirantu jīváse ‖
1.089.03a tā́n pū́rvayā nivídā hūmahe vayám bhágam mitrám áditiṃ dákṣam asrídham |
1.089.03c aryamáṇaṃ váruṇaṃ sómam aśvínā sárasvatī naḥ subhágā máyas karat ‖
1.089.04a tán no vā́to mayobhú vātu bheṣajáṃ tán mātā́ pṛthivī́ tát pitā́ dyaúḥ |
1.089.04c tád grā́vāṇaḥ somasúto mayobhúvas tád aśvinā śṛṇutaṃ dhiṣṇyā yuvám ‖
1.089.05a tám ī́śānaṃ jágatas tasthúṣas pátiṃ dhiyaṃjinvám ávase hūmahe vayám |
1.089.05c pūṣā́ no yáthā védasām ásad vṛdhé rakṣitā́ pāyúr ádabdhaḥ svastáye ‖
1.089.06a svastí na índro vṛddháśravāḥ svastí naḥ pūṣā́ viśvávedāḥ |
1.089.06c svastí nas tā́rkṣyo áriṣṭanemiḥ svastí no bṛ́haspátir dadhātu ‖
1.089.07a pṛ́ṣadaśvā marútaḥ pṛ́śnimātaraḥ śubhaṃyā́vāno vidátheṣu jágmayaḥ |
1.089.07c agnijihvā́ mánavaḥ sū́racakṣaso víśve no devā́ ávasā́ gamann ihá ‖
1.089.08a bhadráṃ kárṇebhiḥ śṛṇuyāma devā bhadrám paśyemākṣábhir yajatrāḥ |
1.089.08c sthiraír áṅgais tuṣṭuvā́ṃsas tanū́bhir vy àśema deváhitaṃ yád ā́yuḥ ‖
1.089.09a śatám ín nú śarádo ánti devā yátrā naś cakrā́ jarásaṃ tanū́nām |
1.089.09c putrā́so yátra pitáro bhávanti mā́ no madhyā́ rīriṣatā́yur gántoḥ ‖
1.089.10a áditir dyaúr áditir antárikṣam áditir mātā́ sá pitā́ sá putráḥ |
1.089.10c víśve devā́ áditiḥ páñca jánā áditir jātám áditir jánitvam ‖
1.090.01a ṛjunītī́ no váruṇo mitró nayatu vidvā́n |
1.090.01c aryamā́ devaíḥ sajóṣāḥ ‖
1.090.02a té hí vásvo vásavānās té ápramūrā máhobhiḥ |
1.090.02c vratā́ rakṣante viśvā́hā ‖
1.090.03a té asmábhyaṃ śárma yaṃsann amṛ́tā mártyebhyaḥ |
1.090.03c bā́dhamānā ápa dvíṣaḥ ‖
1.090.04a ví naḥ patháḥ suvitā́ya ciyántv índro marútaḥ |
1.090.04c pūṣā́ bhágo vándyāsaḥ ‖
1.090.05a utá no dhíyo góagrāḥ pū́ṣan víṣṇav évayāvaḥ |
1.090.05c kártā naḥ svastimátaḥ ‖
1.090.06a mádhu vā́tā ṛtāyaté mádhu kṣaranti síndhavaḥ |
1.090.06c mā́dhvīr naḥ santv óṣadhīḥ ‖
1.090.07a mádhu náktam utóṣáso mádhumat pā́rthivaṃ rájaḥ |
1.090.07c mádhu dyaúr astu naḥ pitā́ ‖
1.090.08a mádhumān no vánaspátir mádhumām̐ astu sū́ryaḥ |