1.001.01a agním īḻe puróhitaṃ yajñásya devám ṛtvíjam - Linguistics

1.123.11c bhadrā́ tvám uṣo vitaráṃ vy ùcha ná tát te anyā́ uṣáso naśanta ‖
1.123.12a áśvāvatīr gómatīr viśvávārā yátamānā raśmíbhiḥ sū́ryasya |
1.123.12c párā ca yánti púnar ā́ ca yanti bhadrā́ nā́ma váhamānā uṣā́saḥ ‖
1.123.13a ṛtásya raśmím anuyáchamānā bhadrám-bhadraṃ krátum asmā́su dhehi |
1.123.13c úṣo no adyá suhávā vy ùchāsmā́su rā́yo maghávatsu ca syuḥ ‖
1.124.01a uṣā́ uchántī samidhāné agnā́ udyán sū́rya urviyā́ jyótir aśret |
1.124.01c devó no átra savitā́ nv ártham prā́sāvīd dvipát prá cátuṣpad ityaí ‖
1.124.02a áminatī daívyāni vratā́ni praminatī́ manuṣy/ yugā́ni |
1.124.02c īyúṣīṇām upamā́ śáśvatīnām āyatīnā́m prathamóṣā́ vy àdyaut ‖
1.124.03a eṣā́ divó duhitā́ práty adarśi jyótir vásānā samanā́ purástāt |
1.124.03c ṛtásya pánthām ánv eti sādhú prajānatī́va ná díśo mināti ‖
1.124.04a úpo adarśi śundhyúvo ná vákṣo nodhā́ ivāvír akṛta priyā́ṇi |
1.124.04c admasán ná sasató bodháyantī śaśvattamā́gāt púnar eyúṣīṇām ‖
1.124.05a pū́rve árdhe rájaso aptyásya gávāṃ jánitry akṛta prá ketúm |
1.124.05c vy ù prathate vitaráṃ várīya óbhā́ pṛṇántī pitrór upásthā ‖
1.124.06a evéd eṣā́ purutámā dṛśé káṃ nā́jāmiṃ ná pári vṛṇakti jāmím |
1.124.06c arepásā tanv/ śā́śadānā nā́rbhād ī́ṣate ná mahó vibhātī́ ‖
1.124.07a abhrātéva puṃsá eti pratīcī́ gartārúg iva sanáye dhánānām |
1.124.07c jāyéva pátya uśatī́ suvā́sā uṣā́ hasréva ní riṇīte ápsaḥ ‖
1.124.08a svásā svásre jyā́yasyai yónim āraig ápaity asyāḥ praticákṣyeva |
1.124.08c vyuchántī raśmíbhiḥ sū́ryasyāñjy àṅkte samanagā́ iva vrā́ḥ ‖
1.124.09a āsā́m pū́rvāsām áhasu svásṝṇām áparā pū́rvām abhy èti paścā́t |
1.124.09c tā́ḥ pratnaván návyasīr nūnám asmé revád uchantu sudínā uṣā́saḥ ‖
1.124.10a prá bodhayoṣaḥ pṛṇató maghony ábudhyamānāḥ paṇáyaḥ sasantu |
1.124.10c revád ucha maghávadbhyo maghoni revát stotré sūnṛte jāráyantī ‖
1.124.11a áveyám aśvaid yuvatíḥ purástād yuṅkté gávām aruṇā́nām ánīkam |
1.124.11c ví nūnám uchād ásati prá ketúr gṛháṃ-gṛham úpa tiṣṭhāte agníḥ ‖
1.124.12a út te váyaś cid vasatér apaptan náraś ca yé pitubhā́jo vyóṣṭau |
1.124.12c amā́ saté vahasi bhū́ri vāmám úṣo devi dāśúṣe mártyāya ‖
1.124.13a ástoḍhvaṃ stomyā bráhmaṇā mé 'vīvṛdhadhvam uśatī́r uṣāsaḥ |
1.124.13c yuṣmā́kaṃ devīr ávasā sanema sahasríṇaṃ ca śatínaṃ ca vā́jam ‖
1.125.01a prātā́ rátnam prātarítvā dadhāti táṃ cikitvā́n pratigṛ́hyā ní dhatte |
1.125.01c téna prajā́ṃ vardháyamāna ā́yū rāyás póṣeṇa sacate suvī́raḥ ‖
1.125.02a sugúr asat suhiraṇyáḥ sváśvo bṛhád asmai váya índro dadhāti |
1.125.02c yás tvāyántaṃ vásunā prātaritvo mukṣī́jayeva pádim utsinā́ti ‖
1.125.03a ā́yam adyá sukṛ́tam prātár ichánn iṣṭéḥ putráṃ vásumatā ráthena |
1.125.03c aṃśóḥ sutám pāyaya matsarásya kṣayádvīraṃ vardhaya sūnṛ́tābhiḥ ‖
1.125.04a úpa kṣaranti síndhavo mayobhúva ījānáṃ ca yakṣyámāṇaṃ ca dhenávaḥ |
1.125.04c pṛṇántaṃ ca pápuriṃ ca śravasyávo ghṛtásya dhā́rā úpa yanti viśvátaḥ ‖
1.125.05a nā́kasya pṛṣṭhé ádhi tiṣṭhati śritó yáḥ pṛṇā́ti sá ha devéṣu gachati |
1.125.05c tásmā ā́po ghṛtám arṣanti síndhavas tásmā iyáṃ dákṣiṇā pinvate sádā ‖
1.125.06a dákṣiṇāvatām íd imā́ni citrā́ dákṣiṇāvatāṃ diví sū́ryāsaḥ |