1.001.01a agním īḻe puróhitaṃ yajñásya devám ṛtvíjam - Linguistics

1.080.07c yád dha tyám māyínam mṛgáṃ tám u tvám māyáyāvadhīr árcann ánu svarā́jyam ‖
1.080.08a ví te vájrāso asthiran navatíṃ nāvy/ ánu |
1.080.08c mahát ta indra vīryàm bāhvós te bálaṃ hitám árcann ánu svarā́jyam ‖
1.080.09a sahásraṃ sākám arcata pári ṣṭobhata viṃśatíḥ |
1.080.09c śataínam ánv anonavur índrāya bráhmódyatam árcann ánu svarā́jyam ‖
1.080.10a índro vṛtrásya táviṣīṃ nír ahan sáhasā sáhaḥ |
1.080.10c mahát tád asya paúṃsyaṃ vṛtráṃ jaghanvā́m̐ asṛjad árcann ánu svarā́jyam ‖
1.080.11a imé cit táva manyáve vépete bhiyásā mahī́ |
1.080.11c yád indra vajrinn ójasā vṛtrám marútvām̐ ávadhīr árcann ánu svarā́jyam ‖
1.080.12a ná vépasā ná tanyaténdraṃ vṛtró ví bībhayat |
1.080.12c abhy ènaṃ vájra āyasáḥ sahásrabhṛṣṭir āyatā́rcann ánu svarā́jyam ‖
1.080.13a yád vṛtráṃ táva cāśániṃ vájreṇa samáyodhayaḥ |
1.080.13c áhim indra jíghāṃsato diví te badbadhe śávó 'rcann ánu svarā́jyam ‖
1.080.14a abhiṣṭané te adrivo yát sthā́ jágac ca rejate |
1.080.14c tváṣṭā cit táva manyáva índra vevijyáte bhiyā́rcann ánu svarā́jyam ‖
1.080.15a nahí nú yā́d adhīmásī́ndraṃ kó vīry/ paráḥ |
1.080.15c tásmin nṛmṇám utá krátuṃ devā́ ójāṃsi sáṃ dadhur árcann ánu svarā́jyam ‖
1.080.16a yā́m átharvā mánuṣ pitā́ dadhyáṅ dhíyam átnata |
1.080.16c tásmin bráhmāṇi pūrváthéndra ukthā́ sám agmatā́rcann ánu svarā́jyam ‖
1.081.01a índro mádāya vāvṛdhe śávase vṛtrahā́ nṛ́bhiḥ |
1.081.01c tám ín mahátsv ājíṣūtém árbhe havāmahe sá vā́jeṣu prá no 'viṣat ‖
1.081.02a ási hí vīra sényó 'si bhū́ri parādadíḥ |
1.081.02c ási dabhrásya cid vṛdhó yájamānāya śikṣasi sunvaté bhū́ri te vásu ‖
1.081.03a yád udī́rata ājáyo dhṛṣṇáve dhīyate dhánā |
1.081.03c yukṣvā́ madacyútā hárī káṃ hánaḥ káṃ vásau dadho 'smā́m̐ indra vásau dadhaḥ ‖
1.081.04a krátvā mahā́m̐ anuṣvadhám bhīmá ā́ vāvṛdhe śávaḥ |
1.081.04c śriyá ṛṣvá upākáyor ní śiprī́ hárivān dadhe hástayor vájram āyasám ‖
1.081.05a ā́ paprau pā́rthivaṃ rájo badbadhé rocanā́ diví |
1.081.05c ná tvā́vām̐ indra káś caná ná jātó ná janiṣyaté 'ti víśvaṃ vavakṣitha ‖
1.081.06a yó aryó martabhójanam parādádāti dāśúṣe |
1.081.06c índro asmábhyaṃ śikṣatu ví bhajā bhū́ri te vásu bhakṣīyá táva rā́dhasaḥ ‖
1.081.07a máde-made hí no dadír yūthā́ gávām ṛjukrátuḥ |
1.081.07c sáṃ gṛbhāya purū́ śatóbhayāhastyā́ vásu śiśīhí rāyá ā́ bhara ‖
1.081.08a mādáyasva suté sácā śávase śūra rā́dhase |
1.081.08c vidmā́ hí tvā purūvásum úpa kā́mān sasṛjmáhé 'thā no 'vitā́ bhava ‖
1.081.09a eté ta indra jantávo víśvam puṣyanti vā́ryam |
1.081.09c antár hí khyó jánānām aryó védo ádāśuṣāṃ téṣāṃ no véda ā́ bhara ‖
1.082.01a úpo ṣú śṛṇuhī́ gíro mághavan mā́tathā iva |
1.082.01c yadā́ naḥ sūnṛ́tāvataḥ kára ā́d artháyāsa íd yójā nv ìndra te hárī ‖
1.082.02a ákṣann ámīmadanta hy áva priyā́ adhūṣata |
1.082.02c ástoṣata svábhānavo víprā náviṣṭhayā matī́ yójā nv ìndra te hárī ‖
1.082.03a susaṃdṛ́śaṃ tvā vayám mághavan vandiṣīmáhi |