1.001.01a agním īḻe puróhitaṃ yajñásya devám ṛtvíjam - Linguistics

1.013.01a súsamiddho na ā́ vaha devā́m̐ agne havíṣmate |
1.013.01c hótaḥ pāvaka yákṣi ca ‖
1.013.02a mádhumantaṃ tanūnapād yajñáṃ devéṣu naḥ kave |
1.013.02c adyā́ kṛṇuhi vītáye ‖
1.013.03a nárāśáṃsam ihá priyám asmín yajñá úpa hvaye |
1.013.03c mádhujihvaṃ haviṣkṛ́tam ‖
1.013.04a ágne sukhátame ráthe devā́m̐ īḻitá ā́ vaha |
1.013.04c ási hótā mánurhitaḥ ‖
1.013.05a stṛṇītá barhír ānuṣág ghṛtápṛṣṭham manīṣiṇaḥ |
1.013.05c yátrāmṛ́tasya cákṣaṇam ‖
1.013.06a ví śrayantām ṛtāvṛ́dho dvā́ro devī́r asaścátaḥ |
1.013.06c adyā́ nūnáṃ ca yáṣṭave ‖
1.013.07a náktoṣā́sā supéśasāsmín yajñá úpa hvaye |
1.013.07c idáṃ no barhír āsáde ‖
1.013.08a tā́ sujihvā́ úpa hvaye hótārā daívyā kavī́ |
1.013.08c yajñáṃ no yakṣatām imám ‖
1.013.09a íḻā sárasvatī mahī́ tisró devī́r mayobhúvaḥ |
1.013.09c barhíḥ sīdantv asrídhaḥ ‖
1.013.10a ihá tváṣṭāram agriyáṃ viśvárūpam úpa hvaye |
1.013.10c asmā́kam astu kévalaḥ ‖
1.013.11a áva sṛjā vanaspate déva devébhyo havíḥ |
1.013.11c prá dātúr astu cétanam ‖
1.013.12a svā́hā yajñáṃ kṛṇotanéndrāya yájvano gṛhé |
1.013.12c tátra devā́m̐ úpa hvaye ‖
1.014.01a aíbhir agne dúvo gíro víśvebhiḥ sómapītaye |
1.014.01c devébhir yāhi yákṣi ca ‖
1.014.02a ā́ tvā káṇvā ahūṣata gṛṇánti vipra te dhíyaḥ |
1.014.02c devébhir agna ā́ gahi ‖
1.014.03a indravāyū́ bṛ́haspátim mitrā́gním pūṣáṇam bhágam |
1.014.03c ādityā́n mā́rutaṃ gaṇám ‖
1.014.04a prá vo bhriyanta índavo matsarā́ mādayiṣṇávaḥ |
1.014.04c drapsā́ mádhvaś camūṣádaḥ ‖
1.014.05a ī́ḻate tvā́m avasyávaḥ káṇvāso vṛktábarhiṣaḥ |
1.014.05c havíṣmanto araṃkṛ́taḥ ‖
1.014.06a ghṛtápṛṣṭhā manoyújo yé tvā váhanti váhnayaḥ |
1.014.06c ā́ devā́n sómapītaye ‖
1.014.07a tā́n yájatrām̐ ṛtāvṛ́dhó 'gne pátnīvatas kṛdhi |
1.014.07c mádhvaḥ sujihva pāyaya ‖
1.014.08a yé yájatrā yá ī́ḍyās té te pibantu jihváyā |
1.014.08c mádhor agne váṣaṭkṛti ‖
1.014.09a ā́kīṃ sū́ryasya rocanā́d víśvān devā́m̐ uṣarbúdhaḥ |