1.001.01a agním īḻe puróhitaṃ yajñásya devám ṛtvíjam - Linguistics

1.084.10c yā́ índreṇa sayā́varīr vṛ́ṣṇā mádanti śobháse vásvīr ánu svarā́jyam ‖
1.084.11a tā́ asya pṛśanāyúvaḥ sómaṃ śrīṇanti pṛ́śnayaḥ |
1.084.11c priyā́ índrasya dhenávo vájraṃ hinvanti sā́yakaṃ vásvīr ánu svarā́jyam ‖
1.084.12a tā́ asya námasā sáhaḥ saparyánti prácetasaḥ |
1.084.12c vratā́ny asya saścire purū́ṇi pūrvácittaye vásvīr ánu svarā́jyam ‖
1.084.13a índro dadhīcó asthábhir vṛtrā́ṇy ápratiṣkutaḥ |
1.084.13c jaghā́na navatī́r náva ‖
1.084.14a ichánn áśvasya yác chíraḥ párvateṣv ápaśritam |
1.084.14c tád vidac charyaṇā́vati ‖
1.084.15a átrā́ha gór amanvata nā́ma tváṣṭur apīcyàm |
1.084.15c itthā́ candrámaso gṛhé ‖
1.084.16a kó adyá yuṅkte dhurí gā́ ṛtásya śímīvato bhāmíno durhṛṇāyū́n |
1.084.16c āsánniṣūn hṛtsváso mayobhū́n yá eṣām bhṛtyā́m ṛṇádhat sá jīvāt ‖
1.084.17a ká īṣate tujyáte kó bibhāya kó maṃsate sántam índraṃ kó ánti |
1.084.17c kás tokā́ya ká íbhāyotá rāyé 'dhi bravat tanvè kó jánāya ‖
1.084.18a kó agním īṭṭe havíṣā ghṛténa srucā́ yajātā ṛtúbhir dhruvébhiḥ |
1.084.18c kásmai devā́ ā́ vahān āśú hóma kó maṃsate vītíhotraḥ sudeváḥ ‖
1.084.19a tvám aṅgá prá śaṃsiṣo deváḥ śaviṣṭha mártyam |
1.084.19c ná tvád anyó maghavann asti marḍiténdra brávīmi te vácaḥ ‖
1.084.20a mā́ te rā́dhāṃsi mā́ ta ūtáyo vaso 'smā́n kádā canā́ dabhan |
1.084.20c víśvā ca na upamimīhí mānuṣa vásūni carṣaṇíbhya ā́ ‖
1.085.01a prá yé śúmbhante jánayo ná sáptayo yā́man rudrásya sūnávaḥ sudáṃsasaḥ |
1.085.01c ródasī hí marútaś cakriré vṛdhé mádanti vīrā́ vidátheṣu ghṛ́ṣvayaḥ ‖
1.085.02a tá ukṣitā́so mahimā́nam āśata diví rudrā́so ádhi cakrire sádaḥ |
1.085.02c árcanto arkáṃ janáyanta indriyám ádhi śríyo dadhire pṛ́śnimātaraḥ ‖
1.085.03a gómātaro yác chubháyante añjíbhis tanū́ṣu śubhrā́ dadhire virúkmataḥ |
1.085.03c bā́dhante víśvam abhimātínam ápa vártmāny eṣām ánu rīyate ghṛtám ‖
1.085.04a ví yé bhrā́jante súmakhāsa ṛṣṭíbhiḥ pracyāváyanto ácyutā cid ójasā |
1.085.04c manojúvo yán maruto rátheṣv ā́ vṛ́ṣavrātāsaḥ pṛ́ṣatīr áyugdhvam ‖
1.085.05a prá yád rátheṣu pṛ́ṣatīr áyugdhvaṃ vā́je ádrim maruto raṃháyantaḥ |
1.085.05c utā́ruṣásya ví ṣyanti dhā́rāś cármevodábhir vy ùndanti bhū́ma ‖
1.085.06a ā́ vo vahantu sáptayo raghuṣyádo raghupátvānaḥ prá jigāta bāhúbhiḥ |
1.085.06c sī́datā́ barhír urú vaḥ sádas kṛtám mādáyadhvam maruto mádhvo ándhasaḥ ‖
1.085.07a tè 'vardhanta svátavaso mahitvanā́ nā́kaṃ tasthúr urú cakrire sádaḥ |
1.085.07c víṣṇur yád dhā́vad vṛ́ṣaṇam madacyútaṃ váyo ná sīdann ádhi barhíṣi priyé ‖
1.085.08a śū́rā ivéd yúyudhayo ná jágmayaḥ śravasyávo ná pṛ́tanāsu yetire |
1.085.08c bháyante víśvā bhúvanā marúdbhyo rā́jāna iva tveṣásaṃdṛśo náraḥ ‖
1.085.09a tváṣṭā yád vájraṃ súkṛtaṃ hiraṇyáyaṃ sahásrabhṛṣṭiṃ svápā ávartayat |
1.085.09c dhattá índro náry ápāṃsi kártavé 'han vṛtráṃ nír apā́m aubjad arṇavám ‖
1.085.10a ūrdhváṃ nunudre 'vatáṃ tá ójasā dādṛhāṇáṃ cid bibhidur ví párvatam |
1.085.10c dhámanto vāṇám marútaḥ sudā́navo máde sómasya ráṇyāni cakrire ‖
1.085.11a jihmáṃ nunudre 'vatáṃ táyā diśā́siñcann útsaṃ gótamāya tṛṣṇáje |
1.085.11c ā́ gachantīm ávasā citrábhānavaḥ kā́maṃ víprasya tarpayanta dhā́mabhiḥ ‖
1.085.12a yā́ vaḥ śárma śaśamānā́ya sánti tridhā́tūni dāśúṣe yachatā́dhi |
1.085.12c asmábhyaṃ tā́ni maruto ví yanta rayíṃ no dhatta vṛṣaṇaḥ suvī́ram ‖