1.001.01a agním īḻe puróhitaṃ yajñásya devám ṛtvíjam - Linguistics

1.185.06c dadhā́te yé amṛ́taṃ suprátīke dyā́vā rákṣatam pṛthivī no ábhvāt ‖
1.185.07a urvī́ pṛthvī́ bahulé dūréante úpa bruve námasā yajñé asmín |
1.185.07c dadhā́te yé subháge suprátūrtī dyā́vā rákṣatam pṛthivī no ábhvāt ‖
1.185.08a devā́n vā yác cakṛmā́ kác cid ā́gaḥ sákhāyaṃ vā sádam íj jā́spatiṃ vā |
1.185.08c iyáṃ dhī́r bhūyā avayā́nam eṣāṃ dyā́vā rákṣatam pṛthivī no ábhvāt ‖
1.185.09a ubhā́ śáṃsā náryā mā́m aviṣṭām ubhé mā́m ūtī́ ávasā sacetām |
1.185.09c bhū́ri cid aryáḥ sudā́starāyeṣā́ mádanta iṣayema devāḥ ‖
1.185.10a ṛtáṃ divé tád avocam pṛthivyā́ abhiśrāvā́ya prathamáṃ sumedhā́ḥ |
1.185.10c pātā́m avadyā́d duritā́d abhī́ke pitā́ mātā́ ca rakṣatām ávobhiḥ ‖
1.185.11a idáṃ dyāvāpṛthivī satyám astu pítar mā́tar yád ihópabruvé vām |
1.185.11c bhūtáṃ devā́nām avamé ávobhir vidyā́meṣáṃ vṛjánaṃ jīrádānum ‖
1.186.01a ā́ na íḻābhir vidáthe suśastí viśvā́naraḥ savitā́ devá etu |
1.186.01c ápi yáthā yuvāno mátsathā no víśvaṃ jágad abhipitvé manīṣā́ ‖
1.186.02a ā́ no víśva ā́skrā gamantu devā́ mitró aryamā́ váruṇaḥ sajóṣāḥ |
1.186.02c bhúvan yáthā no víśve vṛdhā́saḥ káran suṣā́hā vithuráṃ ná śávaḥ ‖
1.186.03a préṣṭhaṃ vo átithiṃ gṛṇīṣe 'gníṃ śastíbhis turváṇiḥ sajóṣāḥ |
1.186.03c ásad yáthā no váruṇaḥ sukīrtír íṣaś ca parṣad arigūrtáḥ sūríḥ ‖
1.186.04a úpa va éṣe námasā jigīṣóṣā́sānáktā sudúgheva dhenúḥ |
1.186.04c samāné áhan vimímāno arkáṃ víṣurūpe páyasi sásminn ū́dhan ‖
1.186.05a utá nó 'hir budhnyò máyas kaḥ śíśuṃ ná pipyúṣīva veti síndhuḥ |
1.186.05c yéna nápātam apā́ṃ junā́ma manojúvo vṛ́ṣaṇo yáṃ váhanti ‖
1.186.06a utá na īṃ tváṣṭā́ gantv áchā smát sūríbhir abhipitvé sajóṣāḥ |
1.186.06c ā́ vṛtrahéndraś carṣaṇiprā́s tuvíṣṭamo narā́ṃ na ihá gamyāḥ ‖
1.186.07a utá na īm matáyó 'śvayogāḥ śíśuṃ ná gā́vas táruṇaṃ rihanti |
1.186.07c tám īṃ gíro jánayo ná pátnīḥ surabhíṣṭamaṃ narā́ṃ nasanta ‖
1.186.08a utá na īm marúto vṛddhásenāḥ smád ródasī sámanasaḥ sadantu |
1.186.08c pṛ́ṣadaśvāso 'vánayo ná ráthā riśā́daso mitrayújo ná devā́ḥ ‖
1.186.09a prá nú yád eṣām mahinā́ cikitré prá yuñjate prayújas té suvṛktí |
1.186.09c ádha yád eṣāṃ sudíne ná śárur víśvam ériṇam pruṣāyánta sénāḥ ‖
1.186.10a pró aśvínāv ávase kṛṇudhvam prá pūṣáṇaṃ svátavaso hí sánti |
1.186.10c adveṣó víṣṇur vā́ta ṛbhukṣā́ áchā sumnā́ya vavṛtīya devā́n ‖
1.186.11a iyáṃ sā́ vo asmé dī́dhitir yajatrā apiprā́ṇī ca sádanī ca bhūyāḥ |
1.186.11c ní yā́ devéṣu yátate vasūyúr vidyā́meṣáṃ vṛjánaṃ jīrádānum ‖
1.187.01a pitúṃ nú stoṣam mahó dharmā́ṇaṃ táviṣīm |
1.187.01c yásya tritó vy ójasā vṛtráṃ víparvam ardáyat ‖
1.187.02a svā́do pito mádho pito vayáṃ tvā vavṛmahe |
1.187.02c asmā́kam avitā́ bhava ‖
1.187.03a úpa naḥ pitav ā́ cara śiváḥ śivā́bhir ūtíbhiḥ |
1.187.03c mayobhúr adviṣeṇyáḥ sákhā suśévo ádvayāḥ ‖
1.187.04a táva tyé pito rásā rájāṃsy ánu víṣṭhitāḥ |
1.187.04c diví vā́tā iva śritā́ḥ ‖