1.001.01a agním īḻe puróhitaṃ yajñásya devám ṛtvíjam - Linguistics

1.005.01c sákhāya stómavāhasaḥ ‖
1.005.02a purūtámam purūṇā́m ī́śānaṃ vā́ryāṇām |
1.005.02c índraṃ sóme sácā suté ‖
1.005.03a sá ghā no yóga ā́ bhuvat sá rāyé sá púraṃdhyām |
1.005.03c gámad vā́jebhir ā́ sá naḥ ‖
1.005.04a yásya saṃsthé ná vṛṇváte hárī samátsu śátravaḥ |
1.005.04c tásmā índrāya gāyata ‖
1.005.05a sutapā́vne sutā́ imé śúcayo yanti vītáye |
1.005.05c sómāso dádhyāśiraḥ ‖
1.005.06a tváṃ sutásya pītáye sadyó vṛddhó ajāyathāḥ |
1.005.06c índra jyaíṣṭhyāya sukrato ‖
1.005.07a ā́ tvā viśantv āśávaḥ sómāsa indra girvaṇaḥ |
1.005.07c śáṃ te santu prácetase ‖
1.005.08a tvā́ṃ stómā avīvṛdhan tvā́m ukthā́ śatakrato |
1.005.08c tvā́ṃ vardhantu no gíraḥ ‖
1.005.09a ákṣitotiḥ saned imáṃ vā́jam índraḥ sahasríṇam |
1.005.09c yásmin víśvāni paúṃsyā ‖
1.005.10a mā́ no mártā abhí druhan tanū́nām indra girvaṇaḥ |
1.005.10c ī́śāno yavayā vadhám ‖
1.006.01a yuñjánti bradhnám aruṣáṃ cárantam pári tasthúṣaḥ |
1.006.01c rócante rocanā́ diví ‖
1.006.02a yuñjánty asya kā́myā hárī vípakṣasā ráthe |
1.006.02c śóṇā dhṛṣṇū́ nṛvā́hasā ‖
1.006.03a ketúṃ kṛṇvánn aketáve péśo maryā apeśáse |
1.006.03c sám uṣádbhir ajāyathāḥ ‖
1.006.04a ā́d áha svadhā́m ánu púnar garbhatvám eriré |
1.006.04c dádhānā nā́ma yajñíyam ‖
1.006.05a vīḻú cid ārujatnúbhir gúhā cid indra váhnibhiḥ |
1.006.05c ávinda usríyā ánu ‖
1.006.06a devayánto yáthā matím áchā vidádvasuṃ gíraḥ |
1.006.06c mahā́m anūṣata śrutám ‖
1.006.07a índreṇa sáṃ hí dṛ́kṣase saṃjagmānó ábibhyuṣā |
1.006.07c mandū́ samānávarcasā ‖
1.006.08a anavadyaír abhídyubhir makháḥ sáhasvad arcati |
1.006.08c gaṇaír índrasya kā́myaiḥ ‖
1.006.09a átaḥ parijmann ā́ gahi divó vā rocanā́d ádhi |
1.006.09c sám asminn ṛñjate gíraḥ ‖
1.006.10a itó vā sātím ī́mahe divó vā pā́rthivād ádhi |
1.006.10c índram mahó vā rájasaḥ ‖
1.007.01a índram íd gāthíno bṛhád índram arkébhir arkíṇaḥ |
1.007.01c índraṃ vā́ṇīr anūṣata ‖
1.007.02a índra íd dháryoḥ sácā sámmiśla ā́ vacoyújā |