1.001.01a agním īḻe puróhitaṃ yajñásya devám ṛtvíjam - Linguistics

1.016.05a sémáṃ na stómam ā́ gahy úpedáṃ sávanaṃ sutám |
1.016.05c gauró ná tṛṣitáḥ piba ‖
1.016.06a imé sómāsa índavaḥ sutā́so ádhi barhíṣi |
1.016.06c tā́m̐ indra sáhase piba ‖
1.016.07a ayáṃ te stómo agriyó hṛdispṛ́g astu śáṃtamaḥ |
1.016.07c áthā sómaṃ sutám piba ‖
1.016.08a víśvam ít sávanaṃ sutám índro mádāya gachati |
1.016.08c vṛtrahā́ sómapītaye ‖
1.016.09a sémáṃ naḥ kā́mam ā́ pṛṇa góbhir áśvaiḥ śatakrato |
1.016.09c stávāma tvā svādhyàḥ ‖
1.017.01a índrāváruṇayor aháṃ samrā́jor áva ā́ vṛṇe |
1.017.01c tā́ no mṛḻāta īdṛ́śe ‖
1.017.02a gántārā hí sthó 'vase hávaṃ víprasya mā́vataḥ |
1.017.02c dhartā́rā carṣaṇīnā́m ‖
1.017.03a anukāmáṃ tarpayethām índrāvaruṇa rāyá ā́ |
1.017.03c tā́ vāṃ nédiṣṭham īmahe ‖
1.017.04a yuvā́ku hí śácīnāṃ yuvā́ku sumatīnā́m |
1.017.04c bhūyā́ma vājadā́vnām ‖
1.017.05a índraḥ sahasradā́vnāṃ váruṇaḥ śáṃsyānām |
1.017.05c krátur bhavaty ukthyàḥ ‖
1.017.06a táyor íd ávasā vayáṃ sanéma ní ca dhīmahi |
1.017.06c syā́d utá prarécanam ‖
1.017.07a índrāvaruṇa vām aháṃ huvé citrā́ya rā́dhase |
1.017.07c asmā́n sú jigyúṣas kṛtam ‖
1.017.08a índrāvaruṇa nū́ nú vāṃ síṣāsantīṣu dhīṣv ā́ |
1.017.08c asmábhyaṃ śárma yachatam ‖
1.017.09a prá vām aśnotu suṣṭutír índrāvaruṇa yā́ṃ huvé |
1.017.09c yā́m ṛdhā́the sadhástutim ‖
1.018.01a somā́naṃ sváraṇaṃ kṛṇuhí brahmaṇas pate |
1.018.01c kakṣī́vantaṃ yá auśijáḥ ‖
1.018.02a yó revā́n yó amīvahā́ vasuvít puṣṭivárdhanaḥ |
1.018.02c sá naḥ siṣaktu yás turáḥ ‖
1.018.03a mā́ naḥ śáṃso áraruṣo dhūrtíḥ práṇaṅ mártyasya |
1.018.03c rákṣā ṇo brahmaṇas pate ‖
1.018.04a sá ghā vīró ná riṣyati yám índro bráhmaṇas pátiḥ |
1.018.04c sómo hinóti mártyam ‖
1.018.05a tváṃ tám brahmaṇas pate sóma índraś ca mártyam |
1.018.05c dákṣiṇā pātv áṃhasaḥ ‖
1.018.06a sádasas pátim ádbhutam priyám índrasya kā́myam |
1.018.06c saním medhā́m ayāsiṣam ‖
1.018.07a yásmād ṛté ná sídhyati yajñó vipaścítaś caná |
1.018.07c sá dhīnā́ṃ yógam invati ‖