1.001.01a agním īḻe puróhitaṃ yajñásya devám ṛtvíjam - Linguistics

1.154.06c átrā́ha tád urugāyásya vṛ́ṣṇaḥ paramám padám áva bhāti bhū́ri ‖
1.155.01a prá vaḥ pā́ntam ándhaso dhiyāyaté mahé śū́rāya víṣṇave cārcata |
1.155.01c yā́ sā́nuni párvatānām ádābhyā mahás tasthátur árvateva sādhúnā ‖
1.155.02a tveṣám itthā́ samáraṇaṃ śímīvator índrāviṣṇū sutapā́ vām uruṣyati |
1.155.02c yā́ mártyāya pratidhīyámānam ít kṛśā́nor ástur asanā́m uruṣyáthaḥ ‖
1.155.03a tā́ īṃ vardhanti máhy asya paúṃsyaṃ ní mātárā nayati rétase bhujé |
1.155.03c dádhāti putró 'varam páram pitúr nā́ma tṛtī́yam ádhi rocané diváḥ ‖
1.155.04a tát-tad íd asya paúṃsyaṃ gṛṇīmasīnásya trātúr avṛkásya mīḻhúṣaḥ |
1.155.04c yáḥ pā́rthivāni tribhír íd vígāmabhir urú krámiṣṭorugāyā́ya jīváse ‖
1.155.05a dvé íd asya krámaṇe svardṛ́śo 'bhikhyā́ya mártyo bhuraṇyati |
1.155.05c tṛtī́yam asya nákir ā́ dadharṣati váyaś caná patáyantaḥ patatríṇaḥ ‖
1.155.06a catúrbhiḥ sākáṃ navatíṃ ca nā́mabhiś cakráṃ ná vṛttáṃ vyátīm̐r avīvipat |
1.155.06c bṛháccharīro vimímāna ṛ́kvabhir yúvā́kumāraḥ práty ety āhavám ‖
1.156.01a bhávā mitró ná śévyo ghṛtā́sutir víbhūtadyumna evayā́ u sapráthāḥ |
1.156.01c ádhā te viṣṇo vidúṣā cid árdhya stómo yajñáś ca rā́dhyo havíṣmatā ‖
1.156.02a yáḥ pūrvyā́ya vedháse návīyase sumájjānaye víṣṇave dádāśati |
1.156.02c yó jātám asya maható máhi brávat séd u śrávobhir yújyaṃ cid abhy àsat ‖
1.156.03a tám u stotāraḥ pūrvyáṃ yáthā vidá ṛtásya gárbhaṃ janúṣā pipartana |
1.156.03c ā́sya jānánto nā́ma cid vivaktana mahás te viṣṇo sumatím bhajāmahe ‖
1.156.04a tám asya rā́jā váruṇas tám aśvínā krátuṃ sacanta mā́rutasya vedhásaḥ |
1.156.04c dādhā́ra dákṣam uttamám aharvídaṃ vrajáṃ ca víṣṇuḥ sákhivām̐ aporṇuté ‖
1.156.05a ā́ yó vivā́ya sacáthāya daívya índrāya víṣṇuḥ sukṛ́te sukṛ́ttaraḥ |
1.156.05c vedhā́ ajinvat triṣadhasthá ā́ryam ṛtásya bhāgé yájamānam ā́bhajat ‖
1.157.01a ábodhy agnír jmá úd eti sū́ryo vy ùṣā́ś candrā́ mahy /vo arcíṣā |
1.157.01c ā́yukṣātām aśvínā yā́tave rátham prā́sāvīd deváḥ savitā́ jágat pṛ́thak ‖
1.157.02a yád yuñjā́the vṛ́ṣaṇam aśvinā ráthaṃ ghṛténa no mádhunā kṣatrám ukṣatam |
1.157.02c asmā́kam bráhma pṛ́tanāsu jinvataṃ vayáṃ dhánā śū́rasātā bhajemahi ‖
1.157.03a arvā́ṅ tricakró madhuvā́hano rátho jīrā́śvo aśvínor yātu súṣṭutaḥ |
1.157.03c trivandhuró maghávā viśvásaubhagaḥ śáṃ na ā́ vakṣad dvipáde cátuṣpade ‖
1.157.04a ā́ na ū́rjaṃ vahatam aśvinā yuvám mádhumatyā naḥ káśayā mimikṣatam |
1.157.04c prā́yus tā́riṣṭaṃ nī́ rápāṃsi mṛkṣataṃ sédhataṃ dvéṣo bhávataṃ sacābhúvā ‖
1.157.05a yuváṃ ha gárbhaṃ jágatīṣu dhattho yuváṃ víśveṣu bhúvaneṣv antáḥ |
1.157.05c yuvám agníṃ ca vṛṣaṇāv apáś ca vánaspátīm̐r aśvināv aírayethām ‖
1.157.06a yuváṃ ha stho bhiṣájā bheṣajébhir átho ha stho rathy/ rā́thyebhiḥ |
1.157.06c átho ha kṣatrám ádhi dhattha ugrā yó vāṃ havíṣmān mánasā dadā́śa ‖
1.158.01a vásū rudrā́ purumántū vṛdhántā daśasyátaṃ no vṛṣaṇāv abhíṣṭau |
1.158.01c dásrā ha yád rékṇa aucathyó vām prá yát sasrā́the ákavābhir ūtī́ ‖