Gjuha shqipe 7

Libër Mësuesi
Mësimi: Udhëzime, shpjegime, receta
Si të bëjmë një prezantim në klasë
Hapi 1: Planifikoni prezantimin tuaj.
Hartoni planin e punës për realizimin e prezantimit tuaj, duke përcaktuar hapat kryesorë të
zbatimit; Përpunoni idenë tuaj për çështjen e caktuar në varësi të qëllimit, planifikoni aktivitetet
kryesore, afatet, vendin, personat, materialet dhe mjetet e nevojshme për kryerjen e tyre dhe
parashikoni pengesat e mundshme gjatë realizimit;
Regjistroni, skedoni dhe përdorni teknika të tjera për të menaxhuar informacionin/ faktet ose
formulat për një temë duke i radhitur ato sipas llojit, burimit dhe rëndësisë;
Hapi 2: Praktikohuni.
Praktikohuni para familjes, miqve tuaj, ose para pasqyrës, duke lexuar prezantimin tuaj. Kjo është
një mënyrë e mirë për t`u parapërgatitur dhe zbutur emocionet tuaja, për momentin final ku do
të referoni para klasës. Pyesni miqtë tuaj për reagimet dhe kritikat pasi të keni përfunduar
prezantimin tuaj. A u realizua prezantimi në kohën e duhur? Si ishte paraqitja e prezantuesit? A u
shtjelluan në mënyrë të qartë të gjitha pikat?
Hapi 3: Përgatitni prezantimin.
Veçoni informacionet që ju nevojiten nga librat, gazetat, revistat, interneti, radioja, TV etj., i
komentoni dhe i shfrytëzoni ato si referencë gjatë prezantimit tuaj;
Organizoni mendimet tuaja për temën/ problemin e dhënë dhe parashtroni pyetje (pse, çfarë, si,
kur), gjatë prezantimit të materialit tuaj.
Argumentoni ndërmarrjen e hapave konkretë, të cilët çojnë në zgjidhjen e një problemi, nëse ai
qëndron në thelb të materialit tuaj;
Shpjegoni qartë dhe saktë kuptimin e termave të përdorur, duke përdorur gjuhën dhe fjalorin e
përshtatshëm;
Ju, sigurisht nuk jeni një ekspert, apo të keni lexuar çdo libër ose faqe interneti të shkruar për
temën tuaj, por ju duhet të jeni në gjendje t`i përgjigjeni çdo pyetjeje të mësuesit tuaj ose të
shokëve të klasës. Merrni citate nga burime të besueshme. Thëniet e bukura e të gjetura e
pasurojnë dhe e bëjnë interesant një prezantim. Sigurohuni që burimet tuaja të informacionit
janë të besueshme, gjithashtu. Kini kujdes! Jo gjithmonë mund t`i besohet informacioneve të
marra nga interneti.
Hapi 4: Prezantoni.
Menaxhoni emocionet, ndjenjat, kohën, shfrytëzimin e materialeve dhe mjeteve gjatë kryerjes së
një detyre/aktiviteti (në klasë/shkollë apo diku tjetër). Lexoni rrjedhshëm, me intonacionin e
duhur. Buzëqeshni me audiencën tuaj. Tregohuni i kënaqur: ju jeni gati për t`u mësuar të tjerëve
diçka që ata nuk e dinin më parë.
Në një prezantim, ju mund të përdorni mediat digjitale dhe mjediset informative për të
komunikuar dhe bashkëpunuar, duke përfshirë komunikimet në distancë për zhvillimin e
njohurive; Prezantimi juaj mund të jetë digjital ose mund të përdoren mjete të punuara nga vetë
nxënësit, si: tabela konceptuale, postera, makete, albume me fotografi etj.
250