AF_Dialann_Cail%C3%ADn_%C3%93ig

líomanáid a dhéanamh), thug Miep leabhar, Little Martin dó
agus thug Bep planda dó. Cheannaigh sé ubh do gach duine.
Do chara dílis, Anne M. Frank
A Kitty dhil,
AN CHÉADAOIN, 3 BEALTAINE 1944
Ar dtús, scéal na seachtaine! Táimid ag fáil sosa ón
pholaitíocht. Níl rud ar bith ag tarlú, agus tá mé ag insint duit,
rud ar bith arbh fhiú labhairt air. Tá mé ag tosú a chreidbheáil
go dtiocfaidh an t-ionradh. I ndeireadh na dála, ní thig leo
ligint do na Rúisigh an obair mhaslach uile a dhéanamh; le
fírinne, níl na Rúisigh ag déanamh rud ar bith faoi láthair ach
oiread.
Tagann an tUasal Kleiman chun na hoifige gach maidin
anois. Fuair sé seit nua spriongaí do dhibheán Peter, mar sin
de beidh ar Peter dul i mbun oibre á athchumhdach. Ní nach
ionadh, níl fonn air ar chor ar bith. Cheannaigh an tUasal
Kleiman púdar dreancaide do na cait.
Ar inis mé duit go bhfuil Boche s’againn imithe as radharc?
Ní fhaca muid tásc ná tuairisc uirthi ó bhí an Déardaoin seo
caite ann. Is dócha go bhfuil sí i bhflaitheas na gcat cheana féin,
agus go ndearna duine éigin a bhfuil dúil aige sna hainmhithe
sóláistí blasta di. Is féidir go mbeidh girseach éigin a bhfuil
sé ar a hacmhainn aici caipín déanta as fionnadh Boche a
chaitheamh. Tá Peter croíbhriste.
Le dhá sheachtain anuas táimid ag ithe lóin ar leath i ndiaidh
a haon déag Dé Sathairn; ar maidin caithfimid bheith sásta le
babhla bracháin. Ó amárach ar aghaidh beidh sé mar seo gach
lá; sábhálann sé sin béile orainn. Is doiligh teacht ar ghlasraí
fós. Tráthnóna inniu bhí leitís lofa bhruite againn. Gnáthleitís,
spionáiste, agus leitís bhruite, sin a bhfuil ann. Cuir prátaí lofa
leis sin agus beidh béile agat a bheadh fóirsteanach do rí!
311