Mark Bray - IIEP - Unesco

Nəticələr
Yüklənilə bilən repetitor dərsləri texnologiyalarının Koreyada da mövcud olması faktı
qərarvericilər üçün düşündürücü ola bilər. Choe (2009, s. 14) qeyd etmişdir ki, Koreya beş
ildə İnternet sürətinin 10 dəfə artırılması üçün milyardlarla dollar sərf edir. Şagirdlərin
yüklədikləri materialların müəyyən hissələrini sürətli yığmaq, digər hissələri təkrarlamaq və
qeydlər etmək imkanına malik olmaları təkbətək repetitor dərslərinə nisbətən daha çox
çeviklik yaradır. Oflayn dərslər getdikcə daha çox onlayn və üzbəüz dərsləri əvəz edə bilər.
Bu cür oflayn dərslər hökumət qurumları və özəl sektor tərəfindən verilə bilər, ancaq elə
görünür ki, hazırda özəl sektor hakim mövqedədir. Repetitor biznesində internet
liderlərindən biri (sitat Choe-ya aiddir, 2009, s. 4) qeyd etmişdir ki, gələcəkdə “şagirdlər
yəqin ki, məktəbə idmana getdikləri kimi həftədə bir dəfə gedəcəklər”. Bu, bəlkə də çox
kəskin proqnozdur, ancaq müəyyən mühitlərdə müəyyən qrup şagirdlərə, xüsusən imtahan
mövsümündə motivasiyası yüksək olan şagirdlərə uyğun gəlir.
Digər situasiyalarda isə repetitor məktəbləri insanlar arasında təması azaltmır, əksinə
artırır. Sou Makaodan bəhs edərkən ailələrin xarakterinin dəyişdiyini də müşahidə etmişdir
(2007, s. 4), belə ki, burada getdikcə daha çox repetitor məktəbi “uşaqlar üçün qayğı xidməti
göstərirlər”:
Günorta vaxtı məktəbdən sonra repetitor məktəbi uşaqları yedirmək üçün
xüsusi məktəbə aparmalıdır. Daha sonra uşaqlar məktəbə geri qaytarılır və günortadan
sonra dərslərinə davam edirlər. Məktəbdən sonra uşaqlar ev tapşırıqlarını yerinə
yetirmək üçün repetitor məktəbinə aparılırlar və işdən sonra valideynləri gəlib onları
aparana qədər orada olurlar.
Ancaq yəqin ki, məktəblərin özlərinin bu ehtiyaclara cavab verə bilməməsinin elə bir
ciddi səbəbi yoxdur. İngiltərədə müvafiq orqanlar saat 8.00-dan 6.00-a qədər uzadılmış gün
rejimini sınaqdan keçirirlər və bir çox məktəblərdə fasilə vaxtı üçün fəaliyyətlər həyata
keçirilir (Ireson, 2007b). Makaoda hökumət 2002-ci ildə Məktəblərin icmalaşdırılması
proqramını irəli sürmüşdür ki, bu proqram çərçivəsində bir sıra məktəb binaları icma üçün
istifadəyə açılmışdır. Həmçinin, daha böyük yaşlı şagirdlər üçün Makao hökuməti dərs
otaqları təşkil etmiş, vətəndaş təşkilatlarını maliyyələşdirmişdir; 1997-ci ildən etibarən
Makao hökuməti ev tapşırıqlarına yardım üçün telefon xidməti açmışdır (Sou,2007, s. 9).
105
Təhsilin Planlaşdırılması üzrə Beynəlxalq İnstitut
www.iiep.unesco.org