Mark Bray - IIEP - Unesco

Kölgə təhsil sisteminə qarşı müqavimət
Çərçivə 3. Təzyiqlərin idarə olunması
Koreya hökuməti bir qrup xüsusi təyinatlı orta məktəblər açmışdır ki, bu məktəblərdə
bərabərləşdirmə siyasəti tətbiq edilmir. Bu məktəblərə daxil olmaq üçün böyük rəqabət
var və repetitor təhsili qaçılmaz olaraq bunun tərkib hissəsidir. Kim (2007) ayrı-ayrı
ailələrdə təzyiqin idarə olunması yollarını araşdırmışdır. Burada Da-jung adlı qızın və
onun anasının nümunəsi verilir. Burada həmin qızın həyatının ən intensiv dövrü təsvir
olunur; ancaq bununla əlaqədar təzyiq milyonlarla koreyalı uşağın məktəb həyatını
xarakterizə edir.
Da-jung xüsusi təyinatlı orta məktblərə qəbul imtahanından iki ay əvvəl repetitor
məktəbində qeydiyyatdan keçmişdir və Koreya dili, ingilis dili və riyaziyyat üzrə dərs
alır. O, dərsdən sonra axşam saat 5-də repetitor məktəbinə gedir və saat 10-a qədər
orada olur. O, gecə saat 2-yə qədər repetitor məktəbinin müstəqil öyrənmə otağında
qalır, sonra isə, evə qayıdır, gecə saat 3-də yatır, səhər saat 6-da oyanır və məktəbə
gedir.
Da-jungun anası onun az yatması barədə belə deyir:
Mən onu oyadan kimi o, yuxudan durur. Onu oyatdığım üçün özüm narahat
oluram. Bir dəfə yazığım gəldiyi üçün onu saat 6-da oyatmadım, o isə mənə
hirsləndi. O dedi ki, “Sən güclü olmalısan, məni oyatmaq sənin üçün çətin olsa
da oyatmalısan. Bu, mənim xeyrimədir. Yuxudan dura bilməsəm, məni silkələ,
hətta vur.”
Da-jungun anası hesab edir ki, həmin dövrdə onun qızının həyatı çox ağırdır, ancaq
bununla belə, o, repetitor təhsilini sərmayə hesab edir. Bu fikir başqa analarla söhbət
zamanı da bildirilmişdir.
Da-jung-a görə, repetitor məktəbi onun perspektivlərini artırır. Da-jung rəqabətlə
qarşılaşır və daha əzmlə oxuyur. Ancaq onun repetitor məktəbindəki təhsili
məktəbdəki dərslərinə mane olur. Gecə saat 2-yə qədər repetitor məktəbində qaldığı
üçün çox vaxt məktəbdə dərs vaxtı yatır.
Mənbə: Kim (2007), s. 7-8.
Mavritaniya
Koreyada olduğu kimi Mavritaniyanın müvafiq qurumları da repetitor təhsilinin
problemli tərəflərinə qarşı uzun illər mübarizə aparmağa cəhd etmişlər, ancaq o qədər də
müvəffəqiyyət qazana bilməmişlər. TPBİ forumunda Mavritaniyanın iki keçmiş təhsil naziri
bir araya gəlmişdir: Armoogum Parsuramen (1983-1995) və Steven Obeegadoo
(2000-2005). Siyasi cəbhədə onlar fərqli tərəflərdə olsalar da, forumda repetitor təhsilinə
qarşı effektiv tədbirlərin müəyyən edilməsinin çətin olduğu barədə yekdil fikir bildirmişlər.
Onlar həmçinin əlavə etmişlər ki, onlardan əvvəlki və sonrakı həmkarları da eyni problemlə
üzləşmişlər.
54
Təhsilin Planlaşdırılması üzrə Beynəlxalq İnstitut
www.iiep.unesco.org