A variabilidade natural do clima en Galicia - MeteoGalicia

patrón EA presenta unha correlación máis baixa coa chuvia invernal, sendo practicamente
desprezable a súa influencia na fase negativa. Por outra parte, vimos
como Galicia está nunha área xeográfica na que ningún patrón de teleconexión
explica a variación da chuvia invernal en maior medida que outros, sendo máis
ben Galicia unha área xeográfica de transición entre diferentes influencias. Isto
fai que cambios abruptos dun a outro ano poidan explicarse atendendo soamente
a causas rexionais, aínda que os cambios a nivel global tamén teñen influencia
sobre Galicia, como se pon de manifesto co cambio operado durante o ano 1976.
7.3. Preditabilidade
Vistas estas influencias cruzadas sobre Galicia, podemos extraer algunhas
consecuencias con respecto á preditabilidade do clima nesta rexión situada nas
latitudes medias. Como se explicou anteriormente, os patróns de teleconexión
extratropicais poden explicarse case exclusivamente en función da dinámica
interna atmosférica, o cal quere dicir que, a escalas temporais interdecadais, a
súa preditabilidade será baixa ou nula. Isto é debido a que a atmosfera é un sistema
dinámico que poderiamos definir como sen memoria, propiedade debida
a que o sistema é altamente dependente das condicións iniciais. Nese sentido,
non importa o ben que sexamos capaces de definir o estado da atmosfera no
momento inicial, posto que sempre haberá un grao de incerteza subxacente, e
ese grao de incerteza fará que o estado final da atmosfera sexa diferente ao previsto
despois de poucos días de predición. Desta forma, se os patróns de teleconexión
se explicasen soamente en función da dinámica interna da atmosfera,
isto faría que a capacidade de predición climática na escala decadal fose na práctica
nula. Porén, recentes investigacións coa teleconexión NAO, para a que existen
series de máis dun século, demostran que o seu espectro de variabilidade
mostra un certo arroibamento, é dicir, que a variabilidade ten lugar con maior
frecuencia nos períodos máis longos, duns dez anos. Este comportamento non
pode ser debido á atmosfera, posto que, como acabamos de explicar, a situación
de hoxe non influirá en absoluto sobre a que teñamos dentro de anos, e, polo
tanto, ten que ter a súa orixe nos sistemas que fagan de fronteira para a atmosfera
no sistema climático, é dicir, o océano e a terra en superficie e a estratosfera
en altura. Entre estes tres sistemas o mellor candidato para ocasionar variacións
decadais na atmosfera extratropical é o océano, debido á súa dinámica, moito
máis lenta e predicible que a atmosférica. De calquera maneira, debemos engadir
que o arroibamento do espectro de variabilidade da atmosfera é bastante
152 TELECONEXIÓNS