A variabilidade natural do clima en Galicia - MeteoGalicia

3. A sociedade e as adversidades vinculadas á variabilidade do clima
A pesar de que o quentamento global e a elevación do nivel do mar son preocupacións
de importancia fundamental para as actuais e futuras xeracións, a gran
maioría das persoas están máis preocupadas por aspectos inmediatos, como as
condicións para a próxima temporada, a próxima colleita ou o seguinte ano.
Realmente as sociedades deben enfrontarse e sobrevivir a anomalías climáticas
que, aínda que se consideran dunha escala temporal moi curta desde o punto
de vista climático, resultan dunha escala moi significativa desde o punto de vista
social. Nos seguintes parágrafos identificaremos e discutiremos só algúns dos
impactos do clima e a súa variabilidade que posúen importancia desde o punto
de vista social.
3.1. Secas
Cada ano prodúcense secas desastrosas en moitos lugares do mundo. Veñen
ocorrendo a través de toda a historia do xénero humano. Porén, a maioría
descoñece que hai diferentes tipos de secas (meteorolóxicas, agrícolas e hidrolóxicas),
cada unha co seu propio tipo de impacto sobre a sociedade e o medio
ambiente; incluso podería falarse dunha seca sociolóxica se temos en conta a
percepción social e a propaganda dos medios sobre eventos de escaseza de
auga. A percepción máis común do que é a seca está relacionada coa de tipo
meteorolóxico, isto é, unha redución significativa da chuvia durante un período
de tempo determinado. En certa forma, isto é unha determinación arbitraria.
Unha redución da chuvia dun 25% non nos di moito acerca do seu impacto
sobre as colleitas ou os recursos hídricos. Por exemplo, se o restante 75%
logra caer dentro do período crítico de crecemento dos cultivos, a redución
podería non afectar á colleita e, polo tanto, non ser motivo de preocupación
para os agricultores. A seca agrícola pode producirse se, con independencia da
cantidade de chuvia caída, esta se produce cando non resulta útil para o crecemento
e desenvolvemento dos cultivos. A seca hidrolóxica está referida a reducións
notables nas escorrentías anuais ou no volume de auga almacenada para
un período dado de tempo.
En sentido xeral, na propia interpretación das dispoñibilidades de auga,
caben distintas interpretacións do concepto de seca. O plan hidrolóxico do Ebro,
por exemplo, considera un período de seca cando durante dous meses consecutivos
a precipitación rexistrada é inferior ao 60% da media do citado mes, mentres
que o do Guadalquivir define a seca dentro dun concepto de oferta e
162 IMPACTO SOCIOECONÓMICO DA VARIABILIDADE CLIMÁTICA