A variabilidade natural do clima en Galicia - MeteoGalicia

canles, e das serras do Suído e Faro de Avión, que, con altitudes próximas aos
1000 m, provocan un ascenso forzado que xera inestabilidade e importantes
chuvias orográficas nas súas abas de barlovento. A precipitación anual media
ao nivel do mar no sector III é de 1283 mm, mentres que nas altitudes máis
baixas do sector VI –entre os 100 e 200 m– a precipitación non supera os 600
mm anuais.
Variación temporal e espacial da precipitación
A precipitación anual ponderada de Galicia é de 1180 mm, se ben os valores
normalizados van desde mínimos próximos aos 500-600 mm no val do Miño-
Sil, ata máximos superiores aos 1800-2000 mm nas serras litorais (o Barbanza,
A Groba) e a dorsal galega (O Suído, Faro de Avión). Do total medio, 337 mm
recóllense no inverno, 280 mm na primavera, 156 mm no verán e 407 mm no
outono, que se erixe na auténtica estación chuviosa do noroeste peninsular. Isto
quere dicir que no repartimento anual, o verán contribúe cun 13%, a primavera
cun 24%, o inverno cun 28% e o outono cun 35% da precipitación anual acumulada.
Como reflicte o mapa [figura 1.13] de precipitación, a distribución espacial
é bastante complexa. En conxunto é a provincia de Pontevedra a que recolle
unha maior precipitación anual, seguida da Coruña e Lugo, mentres que en
Ourense os valores son máis baixos.
A cuarta parte do territorio galego presenta medias anuais que non superan
os 1000 mm, mentres que nun 5% da superficie de Galicia a precipitación é
superior aos 1600 mm e tan só nun 2% é inferior aos 600 mm. A clase dominante
é a de 1000-1200 mm, con cerca dun 30% do territorio, estendéndose
pola costa desde o golfo Ártabro ata a desembocadura do Eo, a maior parte
do interior da provincia de Lugo, e algúns sectores de altitude media na provincia
de Ourense. As seguintes clases máis representadas son as de 800-1000
mm e 1200-1400 mm, cun 22% (A Terra Chá, Monforte, A Limia) e 23% (altitudes
baixas e medias das provincias da Coruña e Pontevedra) da superficie
respectivamente.
No mapa tamén se aprecia a marcada diminución da precipitación nos sectores
interiores de Galicia, relacionada co papel que cumpren as formas do
relevo. Na dorsal, precipitacións superiores aos 1800 mm ocorren a altitudes
medias (600-700 m), mentres que no interior estes valores só se alcanzan en cotas
superiores aos 1500-1600 m na serra dos Ancares e por encima dos 1700 m na
serra de Queixa, mentres que na serra do Eixo a precipitación anual queda moi
lonxe destes valores, mesmo nas cotas máis elevadas.
F. Castillo Rodríguez, A. Martínez Cortizas e R. Blanco Chao 59