A variabilidade natural do clima en Galicia - MeteoGalicia

Os ambientes ombrotérmicos extremos aparecen na provincia de Ourense.
O val do Miño-Sil presenta un dominio moi seco-cálido, ben desenvolvido polas
terras do Ribeiro e Arnoia, así como pola Baixa Limia e a fosa de Monterrei. Marcando
unha interesante disimetría, o dominio moi seco-temperado aparece tan
só ao sur do val do Miño-Sil e polas terras do Bolo. No norte lucense o ambiente
aseméllase máis ao característico da fosa de Monforte. No extremo contrario
encóntranse os réximes moi húmidos ou hiperhúmidos, de frescos a moi fríos,
típicos das serras de Queixa e do Invernadoiro, ambientes que na provincia de
Lugo aparecen tamén nas áreas máis elevadas dos Ancares e do Courel.
Finalmente, é de destacar a peculiaridade das serras sudorientais galegas,
comprendidas entre O Bolo e as serras do Eixo e Pena Trevinca. Os seus dominios
ombrotérmicos, entre o seco-cálido e o moi frío-húmido, responden á intricada
articulación das formas do relevo existentes entre a costa sudoccidental de
Galicia e os límites coas provincias do León e Zamora, interactuando co factor
altitudinal.
4.7. Ventos
O vento é un fenómeno meteorolóxico complexo, posto que é o froito dun
variado conxunto de factores, entre os que destacan a circulación xeral atmosférica,
o relevo e os contrastes térmicos entre mar e terra. O seu estudo esixe a análise
das frecuencias de dirección –traducido graficamente na coñecida rosa dos
ventos– e da intensidade das rachas.
Ventos de carácter rexional
Galicia, a nivel hemisférico, encóntrase inmersa na zona de circulación dos
poñentes, o que implica que os ventos do terceiro e cuarto cuadrante (sudoeste-oeste)
sexan os predominantes, en especial durante o período outono-inverno.
No entanto, en verán, as altas presións subtropicais inverten a rosa dos ventos,
facendo que os fluxos do primeiro e segundo cuadrante (norte-nordeste) se erixan
nos de maior frecuencia. En calquera caso, hai que subliñar que as características
e disposición do relevo galego introducen modificacións intensas na dirección
dos fluxos a moi diversas escalas.
Respecto á intensidade, hai que sinalar que esta garda unha estreita relación
co desprazamento das perturbacións atlánticas desde a súa rexión manancial, no
Atlántico norte, ata as costas galegas. A maior parte dos temporais de vento que
soporta o noroeste peninsular están desencadeados por esas borrascas atlánticas.
78 O CLIMA DE GALICIA