A variabilidade natural do clima en Galicia - MeteoGalicia

zontal, a variación do parámetro de Coriolis coa latitude e un campo de ventos
máis realista. Munk obtén unha circulación, como se mostra na figura 7.12, onde
se encontran representadas as correntes máis importantes dun océano real.
Polo tanto, os procesos que se consideran importantes para determinar os
patróns de circulación de grande escala que resultan da acción do vento nos
océanos son o torque do propio vento, a existencia da variación do parámetro de
Coriolis coa latitude e as forzas de fricción horizontais e verticais.
Efectos das correntes superficiais sobre o clima
O principal efecto das correntes superficiais e en concreto da corrente do
Golfo é a deriva nordatlántica no clima, que consiste no transporte meridional
de enerxía desde latitudes baixas ata altas. Esta calor é devolta á atmosfera en
forma de calor sensible e, sobre todo, en forma de calor latente. Este transporte
de calor, ao canalizarse en forma de correntes mariñas, non se realiza da mesma
forma nas dúas marxes do océano. Así, a corrente do Golfo produce un quentamento
maior da costa occidental europea, se se compara coa norteamericana,
que está afectada ademais pola corrente fría de Labrador. A asimetría térmica
móstrase máis claramente no inverno que no verán, cando os ventos do oeste
transportan o aire que permaneceu sobre a superficie oceánica cara ao interior
do continente europeo. Polo tanto, malia que Galicia e Nova York se sitúan arredor
da latitude 42º N, no inverno a isoterma de 10 ºC pasa pola primeira, mentres
que a segunda é percorrida pola de 0 ºC. No verán, o efecto advectivo e de
continentalidade é menos marcado que en inverno, polo que as isotermas percorren
latitudes similares en ambas as costas. As correntes mariñas e os ventos
do oeste non cambiaron, pero agora a súa influencia é diferente: ao efecto moderador
dos ventos mariños oponse a achega de calor da corrente do Golfo nas costas
europeas, mentres que nas costas norteamericanas o aire cálido do continente
contrarresta o efecto das correntes frías, polo que, ao final, a temperatura é similar
nas dúas costas. Outras influencias térmicas das correntes mariñas consisten
na redución da amplitude térmica e a diminución da influencia da latitude nas
temperaturas. As correntes cálidas, ademais, ao penetraren en zonas onde existe
aire frío, humidifican e inestabilizan a columna de aire (quentando a base), polo
que se vai favorecer a precipitación.
Ademais de todo isto, existe un interrelación entre a posición da corrente do
Golfo e a NAO (North Atlantic Oscillation). Cando o índice da NAO é positivo
e os ventos do oeste son intensos, a corrente do Golfo e a deriva nordatlántica
flúen de forma máis intensa que o normal e a súa traxectoria media desprázase
274 O OCÉANO E O CLIMA