Morfina taldea - Euskara

Eztabaida
Tesi honetan neuropeptido ezberdinak anderatzen dituzten peptidasen
deskribapena egin da gizaki eta arratoiaren garunetan lagin bezala hartuz. Deskribapena
ahalik eta zabalena izan zedin, lehenengoz maila azpizelularrean entzima hauen banaketa
aztertu da. Hurrengo pausuan, baldintza normaletan garuneko atal ezberdinetan entzima
hauen aktibitate banaketa zein den ikusi da, espezie arteko berezitasunak azpimarratuz.
Azkenengo etapan opiazeoekiko menpekotasun fenomenoan gizaki eta arratoien garuneko
atal konkretuetan aktibitate peptidasikoen modulaziorik gertatzen den analizatu da.
Ikerlanean jasotako emaitzak hurrengo hiru puntu hauetan eztabaidatuko dira:
1. Peptidasen banaketa azpizelularra gizaki
eta arratoiaren garun kortexean.
Ugaztun zeluletan peptidoen anderakuntza proteinen katabolismoaren azkenengo
faseetan kokatzen da. Proteina sintesia mintzei lotutako edo aske dauden erribosometan
egiten den bitartean, proteina edo peptidoen anderakuntza maila azpizelularreko gune
ezberdinetan ematen da, mekanismo ezberdinen bidez gertatuz. Edozein organismo
eukariotako zeluletan bezala, garuneko zelulak proteinen bioeraldaketa edo turn-over delakoa
eragiteko mekanismoak dituzte. Hauek proteina anormal edo minduak, egitura proteinak,
proteina erregulatzaileak edo entzimatikoak eraldatzeko beharrezkoak dira eta gune
azpizelular ezberdinetan deskribatu dira (O’Cuinn, 1997).
Neuropeptidoen inaktibazioa nagusiki peptidasen anderakuntzaren ondorioz
gertatzen dela ezarrita dago (Iversen, 1987). Peptidasen zelula kokapenari dagokionez,
mintzekoak edo zitosolikoak daudela dakigu. Lehenengoak ezagunagoak dira eta zentru
aktiboa gune extrazelularrerantz (gune sinaptikorantz) edo barnerantz dutenak bereiz
daitezke (Turner eta lank., 1987; Maroux, 1987; Dyer eta lank., 1991). Peptidasa solugarriak
gutxiago ezagutzen dira baina aktibitate altua azaltzen dutenez ekintza fisiologiko
ezberdinetan funtzio garrantzitsuak izan ditzaketela deskribatu da (Mantle, 1992; O’Cuinn,
1997).
213
Doktore-tesia