Morfina taldea - Euskara

Sarrera
Opiazeoen beste ekintza batzuen artean ezaguna da drogazaleetan morfinak eta
heroinak sistema endokrinoan sortutako asaldurak. Adibidez, ACTH-a edo hipotalamoko
faktore askatzaileen (GnRH-ak) ekoizpen inhibizioa eta basopresina eta prolaktina sintesi
aktibazioa (Lorenzo eta lank., 1999).
Bradikinina eta P substantzia hantura eta minarekin erlazionaturiko bitartekari
zelularrak dira. Lehenengoak sortutako nozizepzioa morfinarekin itzul daiteke. Efektu hau
protein kinasa C-aren bitarteko ekintza bezala deskribatu zen duela gutxi (Inoue eta Ueda,
2000). P substantziari dagokionez, morfinarekiko abstinentzian NSZ-ko atal ezberdinetan
bere anderakuntza igo egiten dela deskribatu zuten Zhou eta lankideek (2001).
Angiotensina II peptido basopresoreari dagokionez, egile batzuk substantzia
antiopioideen artean kokatzen dute. Izan ere, morfinak arratoietan eraginiko analgesia
itzultzeko gai dela deskribatu da (Han eta lank., 2000). Melzig eta lankideek (1998) aortako
zelula endotelialetan morfinak AEE-aren aktibitatea handitzen duela ikusi zuten.
Nahiko argi ikus daitekeenez, opiazeoekiko tolerantzia edo abstinentzia prozesuetan
peptido askoren anderakuntzari buruzko ikerlanak oso eskasak dira. Tesi honen beste
helburuetariko bat opiazeoekiko menpekotasunak peptido ezberdinen entzima
anderatzaileen aktibitatean eraginik duen ala ez deskribatzea izan da, bai gizaki zein animalia
ereduetan.
53
Doktore-tesia