Morfina taldea - Euskara

218
Doktore-tesia
Eztabaida
Zentzu honetan ez dira ikerlan ugariegi agertu, baina badago baten bat. Adibidez,
1970an Frey eta lankideek akuriaren (guinea-pig) garunean mielinizazio garaian peptidasa
aktibitatea deskribatu zuten. 21 urte beranduago Kioussi eta Matsasek (1991) NSZ-eko
neuronen axoiak eztaltzen dituen mielina ekoizten duten Schwann zeluletan endopeptidasa
24.11 entzima (entzefalinasa) isolatu zuten. Kokapen honek nerbioen garapenean edo
birsorkuntzarekin zerikusiren bat izan behar duela proposatu zuten. Hildu honetan nerbio
sistema periferikoko neuronen endekapen mota berezi batean entzefalinasa, APN eta
angiotentsina eraldatzen duen entzima (AEE) bezalako peptidasa ezberdinen aktibitate
aldaketak deskribatu dira (Kenny eta Bourne, 1991).
Beraz, gaur egun arte deskribatutakoaren arabera, zatiki mielinikoan kokatutako
peptidasen zeregina nerbioen garapen edo endekapenarekin erlazionatuta egotea posible
litzateke. Egia esan, gure taldeak garunaren garapenean peptidasek izan lezaketen funtzioari
buruzko ikerketa lerro tinko bat zabaldu du eta horretan dirau (Gandarias eta lank., 1992;
1994; 1997; 1998; Irazusta eta lank., 1999; 2000; Agirregoitia eta lank., 2003).
Zatiki sinaptosomalean esangarriki handiagoak izan diren aktibitateen artean
mintzari lotutako PG I eta PEP aktibitatea ditugu:
PG I-ari dagokionez, bere aktibitatea nagusiki solugarria dela deskribatu den arren
(Cummings eta lank., 1998), mintzari lotutako aktibitatea ere azaltzen dela deskribatu da
(Alba eta lank., 1995); eta lan honetan aurkitutakoaren arabera, gune sinaptikoan funtzioren
bat izan behar duela esan genezake. Sarreran azaltzen den bezala, PG I-a espektru zabaleko
entzima da eta piroglutamiko hondarra duten peptido gehienak anderatu ditzake (Browne
eta lank., 1983); Euren artean TRH-a, LHRH-a, bonbesina, neurotensina, e.a.
Bai gizakia eta bai arratoiaren garun kortexeko sinaptosometan PEP-aren aktibitate
esangarriak aurkitu ditugu. Emaitza hauek O’Leary-ren taldeak (1995; 1996) behi-garunean
deskribatutakoarekin bat datoz. Ikerlari hauek mintzari lotutako PEP aktibitatea
sinaptosometan isolatu zuten. Maila honetan entzima honek izan lezaken funtzioa TRH-a,
ADH-a, P substantzia, e.a peptidoren hidrolisia egitea izan daiteke (Welches eta lank.,
1993).