Morfina taldea - Euskara

222
Doktore-tesia
Eztabaida
2. Peptidasa aktibitateak gizakiaren eta
arratoiaren garuneko atal ezberdinetan.
Peptidasak mikroorganismo, landare eta animalia mota edo espezie ugaritan eta
ehun ezberdinetan isolatu dira (Taylor, 1993). Organo periferikoen artean, gibela,
giltzurrunak, birikak, odol zelulak, gihar eskeletikoa, e.a. organo edo ehunetan peptidasa
aktibitatea azaltzen dela deskribatu da (Mantle, 1992; Goossens eta lank., 1996; Irazusta eta
lank., 2001; Fernández eta lank., 2002).
Lan honetarako aukeratutako entzima guztiak gizakia edo animalien NSZ-ko atalen
batean isolatu izan dira (Kato eta lank., 1980; Kelly eta lank., 1983; Hersh eta lank., 1985;
Gros eta lank., 1985; Matsas eta lank., 1985;…).
Ikerketa deskriptibo honetan lan hauek osatzeko asmoz garuneko 7 atal ezberdin
aukeratu dira beste hainbeste peptidasen aktibitateak gune guztietan hedatzen direnentz eta
nola egiten duten jakiteko. Aukeratutako guneak amigdala, hipotalamoa, hipokanpoa,
estriatuaren nukleo kaudatua eta garun kortexa (prefrontala, parietala eta okzipitala) izan
dira. Aukeraketa honek zergatia bat baino gehiago izan ditu:
I. Alde batetik, atal ezberdin bat baino gehiagotan neurtu nahi izan da, ikerketa
deskriptiboa izanik, peptidasen aktibitateak entzefaloaren hedaduran zehar analizatzea
zentzuzkoena baita. Gainera atal hauen artean, garapen ebolutiboari dagokionez garun
kortexaren kasuan garapen hau ez da berdina izan gizakiaren edo arratoiaren kasuan.
II. Bestetik, gune hauetan peptidasek hidrolisatutako neuropeptidoak azaltzen
direla, proportzio ezberdinetan, deskribatu da (begiratu sarreran).
III. Esperimentuetarako erabilitako teknikak eskatzen dituen lagin kantitateak
mugak jartzen dizkigunez (batez ere arratoi laginekin) aipatutako 7 garun gune hoiek
aukeratu ditugu.