Skólaskýrsla 1995 - Verzlunarskóli Íslands

Slit lærdómsdeildar og
verslunarmenntadeildar 1996
Varaformaður Verzlunarráðs Íslands, Einar Benediktsson, varaformaður skólanefndar,
Ingibjörg R. Guðmundsdóttir, kennarar, nemendur og aðrir góðir gestir!
Ég býð ykkur öll hjartanlega velkomin til þessarar hátíðarstundar, þegar Verzlunarskóla
Íslands verður slitið að loknu 91. starfsári sínu við brautskráningu stúdenta og
verslunarmenntafólks.
Ég býð foreldra og aðra aðstandendur nemenda sérstaklega velkomna hingað.
Brautskráning er sameiginleg gleði- og hátíðarstund nemenda jafnt sem kennara þeirra og
foreldra.
Við sem störfum við skóla bíðum alltaf með talsverðri eftirvæntingu eftir niðurstöðum
prófa, einkum þegar jafnmikið er í húfi og brautskráning. Það stafar e.t.v. að einhverju leyti
af því að úrslit prófanna má líta á sem mælikvarða á árangur skólans sjálfs rétt eins og
nemenda, en einnig og ekki síður vegna þess að eftir svo langa samveru þá eru margir
nemenda orðnir okkur svo nátengdir að við viljum gjarnan sjá þá ná góðri fótfestu á þeirri
braut sem við vitum að hugur þeirra stendur til að feta sig eftir. Við skiljum því vel foreldra
og ástvini sem fylgst hafa með próflestri barnanna af nokkrum kvíða og eftirvæntingu. Biðin
er jafnan erfiðust þegar ekkert er hægt að gera annað en bíða og vona. Það er því eðlilegt að
skólastjóra langi til að kveðja nemendur sína með nokkrum orðum, og það mun hann gera, en
fyrst verður gerð grein fyrir úrslitum prófa.
Í 5. bekk gengu 168 nemendur til prófs. Af þeim hafa 151 lokið prófum, 6 hafa fallið, 4
eiga kost á að endurtaka próf og reyna þannig að ná upp í 6. bekk næsta vetur og 7 eiga enn
ólokið fáeinum prófum. Það er því fyrirsjáanlegt að nokkuð fækkar í 6. bekk næsta vetur.
Í 6. bekk gengu 166 nemendur undir stúdentspróf og hafa 158 þeirra lokið prófum og
munu verða brautskráðir nú. Af þessum 158 stúdentsefnum koma 114 af hagfræðibraut, 21 af
málabraut og 23 af stærðfræðibraut.
Af verslunarmenntabraut verða nú 25 nemendur brautskráðir. Af þeim ljúka 8 einnig
stúdentsprófi úr Öldungadeild til viðbótar verslunarmenntaprófi sínu og verða brautskráðir
héðan með tvenns konar prófskírteini.
Úr Öldungadeild útskrifast nú alls 22 stúdentar til viðbótar við þá 8 úr
Verslunarmenntadeildinni sem áður er getið.
Tveir nemendur hafa lokið stúdentsprófi utanskóla og fá skírteini sín afhent nú. Annar
af stærðfræðibraut en hinn af hagfræðibraut.
Alls telur útskriftarhópurinn því 207 að þessu sinni og verður það að teljast vænn
hópur.
Kæru 6. bekkingar!
Fyrir fjórum árum var ég að taka á móti umsóknum ykkar um inngöngu í 3ja bekk
Verzlunarskólans. Umsóknir voru fleiri en þær höfðu nokkru sinni verið í minni skólastjóra
tíð. Eitthundrað nemendum varð að vísa frá. Enginn var tekinn inn í fyrstu umferð sem hafði
meðaleinkunn undir 7 í samræmdum greinum.
Gleði mín yfir þessari aðsókn entist til hausts og þá féll ég í þá freistni að minnast á það
í skólasetningarræðu minni hve gáfuð þið væruð. Ekki veit ég hvort það var þess vegna en
svo mikið er víst að veturinn var ekki fyrr byrjaður en fyrstu nemendurnir komu upp á
skrifstofu mína til þess að segja sig úr skóla. Síðan dundi hvert áfallið eftir annað á skólanum
159