Skólaskýrsla 1995 - Verzlunarskóli Íslands

kynna ykkur vandlega hvernig sá skóli metur verslunarpróf ykkar og athuga hversu mikill
tími tapast við skiptin. Þar kemur til álita, hvort þið ætlið að halda áfram námi á sömu
námsbraut eða skipta yfir í ólíkt nám. Einnig skiptir máli hvort þið fáið metna hverja
námsgrein fyrir sig eða prófið í heild því vel getur farið svo að námsgreinar þar sem
einkunnir ykkar eru lágar verði afskrifaðar með öllu.
Þó alltaf sé erfiðara að skipta um nám og skóla en halda beint áfram, hvet ég þau ykkar
sem hafa áhuga á slíku eindregið til að kynna sér málin vel og mikla ekki erfiðleikana fyrir
sér, en umfram allt vinnið hratt. Farið strax á fund námsráðgjafa viðkomandi skóla og
fullvissið ykkur um hvað stendur þar til boða og þá sérstaklega hversu mikið námslokum
ykkar muni seinka. Mikil þrengsli eru í mörgum framhaldsskólum og því óvíst hvort þeir
geta eða vilja taka við nýjum nemendum frá öðrum skólum.
Langflestir þeirra sem nú útskrifast munu, ef að líkum lætur, halda áfram námi hér við
skólann. Þá skiptir máli af hvaða námsbraut prófið er tekið og hvort aðaleinkunn nær 6,5.
Þeir sem ekki hafa náð 6,5 geta sótt um að innritast í verslunarmenntadeild. Þar er nám
sniðið fyrir þarfir þeirra sem fremur vilja hefja störf í atvinnulífinu en stofna til langrar
skólagöngu enda þótt hægt sé að breyta prófinu í stúdentspróf með litlu viðbótarnámi í
öldungadeild, aukist áhugi á háskólanámi síðar.
Þeir sem eru yfir 6,5 í aðaleinkunn geta valið um stúdentsnám á málabraut,
hagfræðibraut og stærðfræðibraut til viðbótar við verslunarmenntadeildina. Einungis þeir
sem eru með verslunarpróf af stærðfræðibraut geta haldið áfram námi á þeirri braut.
Nemendur með almennt verslunarpróf og aðaleinkunn yfir 6,5 geta valið um inngöngu á
málabraut eða hagfræðibraut.
Ég hvet ykkur öll til þess að skoða prófskírteini ykkar vandlega og meta rækilega getu
ykkar og möguleika til frekara náms áður en ákvörðun verður tekin.
Ég vek athygli ykkar á reglum Háskóla Íslands sem tóku gildi nýlega. Nú eru einungis
nemendur af stærðfræðibraut teknir inn í verkfræði- og raunvísindadeild. Stúdentspróf af
hagfræðibraut dugir þar ekki lengur.
Maður, sem vill hefja rekstur fyrirtækis, byrjar á því að skoða efnahag sinn og
tekjumöguleika áður en hann ákveður að stofna til fjárskuldbindinga.
Þannig er því einnig farið hjá manni sem vill afla sér menntunar. Hann verður að byrja
á að meta út frá kunnáttu sinni og námsgetu hverjir möguleikar hans eru. Og sá sem leggur
lítið fyrir í sjóð þekkingarinnar verður aldrei auðugur í andanum, en slíkum auð verður sá að
koma sér upp sem vill öðlast háar prófgráður.
Kæru nemendur!
Að nokkrum árum liðnum munu margir ykkar spyrja sjálfa sig í hvaða háskólanám best
sé að fara. Reynslan sýnir að langflestir, sem ljúka verslunarprófi, innritast síðar í háskóla.
Þá munuð þið spyrja: „Hvaða háskólanám get ég farið í” og þá eins og nú mun próf af
einni námsbraut gefa ýmist minni eða meiri möguleika en próf af annarri námsbraut.
Svo góð sem þessi spurning er þá væri betra að spyrja: „Hvaða nám ræð ég við”
Sannleikurinn er sá að fyrir flest, ef ekki öll ykkar, er tiltölulega auðvelt að komast inn í
háskóla en miklu mun erfiðara að komast í gegnum hann og út aftur með eitthvert próf í
höndum. Raunsæi og fyrirhyggja mun þar mestu máli skipta.
Að svo mæltu bið ég nemendur um að ganga fram og veita prófskírteinum sínum
viðtöku.
Ég óska nýútskrifuðum nemendum hjartanlega til hamingju með próf sín.
---
77