ТӨРИЙН АЛБАНЫ ШИНЭТГЭЛ 2022

Арга билгийн мөн чанарыг сүлд, далбаандаа эрхэмлэн залсан улс орны төрийн
албыг жендерийн мэдрэмжгүй гэж бас хэн ч хэлэхгүй байх.
Би багш хүн. Аль ч шатны сургуульд хамгийн сайн сурдаг, хамгийн идэвхтэй
байдаг, хамт олон, найз нөхдөө манлайлан явдаг тэр хүмүүс гол төлөв охид,
бүсгүйчүүд байдгийг мэднэ. Нөр хичээнгүй, манлайлагч тэдний авьяас чадвар
гэнэт алга болчихдоггүй нь дэндүү тодорхой.
Бид охид, бүсгүйчүүдийнхээ тэр сайн сайхан чанарыг насан туршид нь
хадгалах ёстой. Улс орны хөгжил, хүн ардынхаа сайн сайхан аж амьдралын
төлөөх төрийн албаны эрхэм үйлсийн гадна тэднийгээ бодлого, зорилготойгоор
үлдээх, ардаа гээж орхих тийм явцуу, ахархан бодлого монгол төрд байгаагүй,
цаашид ч байх учиргүй.
Жендер, арьс өнгө, хөгжлийн бэрхшээл, хүйсийн баримжааны улмаас бий
болж тогтдог нийгмийн хуваагдал, тэгш бус байдалтай Монгол Улсын төрийн алба
хэзээ ч эвлэрэхгүй гэдэгт би хатуу итгэдэг хүн. Болзошгүй энэ байдлаас урьдчилан
сэргийлсэн, ухааран бодохуйц хуульчилсан төрийн бодлого бий. (Жендерийн эрх
тэгш байдлыг хангах тухай хууль) Хуульчилсан төрийн бодлого хэлбэрэлтгүй, чанд
хэрэгжих учиртай.
Нийгмийн төрөл бүрийн бүлгүүдийн ялгаатай байдлыг хүлээн зөвшөөрсний
үндсэн дээр тэдний хэрэгцээнд чиглэсэн бодлого явуулах, нийгмийн шударга ёсыг
тогтоох тухай үзэл баримтлалыг тууштай баримтлах хандлага олон улсад
нэмэгдсээр байна.
Маш энгийнээр хэлэхэд, эрэгтэй, эмэгтэй хүмүүсийн тэгш байдал гэдэг тэр
хүмүүсийг адил болгоно гэсэн утгаар бус, харин эрх, хариуцлага, боломж нь
хүйсээс үл хамаарна гэсэн үг гэж би боддог. Жендерийн тэгш байдал бий болгох
нь эрэгтэй, эмэгтэй хүмүүсийн сонирхол, хэрэгцээ, урьтлыг (эн тэргүүнд) харгалзан
үзэх, эрэгтэй, эмэгтэй хүмүүсээс бүрдсэн төрөл бүрийн бүлгийн ялгаатай байдлыг
хүлээн зөвшөөрөх явдал.
Төрийн албаны зөвлөлийн дарга Б.Баатарзоригийн хэлсэн үг, илтгэлээс...
110