ТӨРИЙН АЛБАНЫ ШИНЭТГЭЛ 2022

Ажил, мэргэжил, оюуны өндөр чадвартай, төрд чин үнэнчээр зүтгэх
сэтгэлтэй, төр түмний эрх ашгийг хувийнхаасаа өмнө эрэмбэлж чадах, шударга,
зарчимч, хариуцлагатай иргэнийг шалгаруулж мэргэжлийнх нь салбарт
ажиллуулах, тасралтгүй сургаж хөгжүүлэх, мэргэшиж чадсаныг нь тогтвортой
ажиллуулах, тэднийхээ нийгмийн баталгааг нь хангах, харин ажил хийдэггүй,
сэтгэл зүтгэлгүй, зарчмаа умартаж авлига, ашиг сонирхлын зөрчил гаргасантай нь
үл эвлэрэх замаар энэ шинэтгэл хэрэгжинэ.
“Гараа сайн бол бариа сайн” гэсэн мэргэдийн зүйр үг бий. Төрийн албаны
шударга байдал хүний нөөцийн зөв томилгооноос гараа нь эхэлнэ. Зөв хүнийг зөв
аргаар зөв ажилд томилж зөв үр дүнд хүргэх нь томилгооны зорилго, шинэтгэлийн
үр дүн байх ёстой.
Энэ талаар манай 2014 оны тайланд нэг асуудлыг онцолсон байдаг.
Төрийн албаны үндсэн зарчмыг баримтлахгүй явж ирсэн нь монгол төрийн
залгамж чанар, төрийн удирдлагыг сулруулж, Үндэсний аюулгүй байдлын үзэл
баримтлалын 3.3-т заасан дотоод аюулгүй байдлыг доройтуулж болзошгүй
хэмжээнд хүрээд байгааг УИХ-ын анхааралд хүргэсэн. Үр дүнд нь хуулиа
шинэчилсэн.
Өнгөрсөн хугацаанд танил талын дэмжлэг, садан төрлийн нөлөөллөөр
төрийн албанд шууд томилогддог явдал гарсаар байна. Тэр хэрээр төрийн
албаны нэр хүнд, иргэдийн итгэл унаж, засаглалын үнэт зүйлийг хүчгүйдүүлж
байна. “Цүнх баригчид”, “ургийн мод”, “төрлийн алба” гэх нэр томьёо хүртэл гарч,
нийгмийн шүүмжлэл дагуулсаар ирсэн.
Шинэ хуулийг хэрэгжүүлж эхэлснээр өмнөх үеийн зохисгүй арга барил,
дадал хэвшлийг эвдэж, хуулиа дээдэлж, зарчмаа мөрддөг шинэ соёлыг тогтооход
Төрийн албаны зөвлөлийн одоогийн бодлого, үйл ажиллагаа бүхэлдээ чиглэгдэж
байна. Үр дүн ч эхнээсээ гарч байгаа.
Төрийн байгууллагуудын өнөөгийн үйл ажиллагааны талаар сар гаруйн
өмнө 10 аймгийн иргэдийн дунд судалгаа явууллаа.
Төрийн албаны зөвлөлийн дарга Б.Баатарзоригийн хэлсэн үг, илтгэлээс...
80