ТӨРИЙН АЛБАНЫ ШИНЭТГЭЛ 2022

Хүн төрөлхтний мэдлэг оюуны дээжээс хүртэж, сурч мэдсэнээ эх орныхоо
хөгжил дэвшилд зориулж ирсэн олон сайхан жишээ бидэнд бий. Өнгөрсөн зууны
эхээр Европт боловсорсон Д.Нацагдорж, Д.Намдаг, Н.Наваан-Юндэн,
О.Намнандорж тэргүүтэй орчин үеийн сэхээтнүүдээс улбаалсан олон арван
мянган хүнийг энд дурдаж болно.
Шинэ зуун дахь тэдний үргэлжлэл бол Та нар.
Та нар бол их зохиолчийн маань шүлэглэсэнчлэн “Хээрийн галуу нисэн үл
хүрэх газраас...” эрдэм өвөрлөн ирсэн, бас ирж буй хүмүүс.
Та бүхэн бол байнга хувьсан өөрчлөгдөж буй VUCA ертөнц дэх нийгэм,
эдийн засгийн нэн сонирхолтой цаг үед өөрийн мэдлэг, боловсрол, оюун ухаанаа
иргэд, олон түмнийхээ төлөө зориулах хүмүүс.
Хүн ам, демографийн бүтэц ч өөр болж байна.
Энэ оны төрийн албаны ерөнхий шалгалтад шинэ үеийнхний шинэ түрлэг орж
ирсэн. 13 мянга гаруй хүн бүртгүүлсний 50 гаруй (52.4) хувь нь 30 хүртэл насныхан
буюу Z үеийнхэн байна.
Дижитал шилжилтийн орчинд хиймэл оюун ухаантай хүч хавсран ажиллах
хүмүүс бол Та бүхэн.
Улс орны хөгжлийн ирэх 30 жилийг нарийвчлан тодорхойлсон “Алсын
хараа-2050” түүхэн баримт бичгийг гардан хэрэгжүүлэх шинэ үеийн төрийн албан
хаагчид бол Та бүхэн.
Та нар бол “e-Mongolia” хэрэгжиж эхэлсэн, аж үйлдвэрийн (технологийн) 4
дүгээр хувьсгалын үе дэх цахим шилжилтийн төрд ажиллах, бас ажиллаж буй
хүмүүс.
Та бүхэнд Монгол төрийн эрхэм үйлсэд чин шударгуу зүтгэхийн сайны
ерөөл өргөе.
“Ирээдүйн төрийн албыг цогцлоох нь” уриа дор өнөөдөр тэмдэглэж буй
НҮБ-ын төрийн албаны өдрийн мэндийг Та бүхэнд дахин дэвшүүлж, монгол төрийн
хүний нөөцийн чадавхыг бэхжүүлэх хамтын ажиллагаанд амжилт хүсье.
--оОо—
Төрийн албаны зөвлөлийн дарга Б.Баатарзоригийн хэлсэн үг, илтгэлээс...
140