ТӨРИЙН АЛБАНЫ ШИНЭТГЭЛ 2022

Удирдлагын академид сургалтын агуулга, хөтөлбөр шинэчлэх ажил
үргэлжлэн хийгдэж байгаа. Үүний зэрэгцээ Төрийн албаны зөвлөлөөс топ
менежерүүдийн мэргэшүүлэх сургалтад гадаадын нэр хүндтэй их сургуулийн
болон өөрийн орны эрдэмтэн, багш нарыг урьж оролцуулж байна.
Төрийн албаны зөвлөлөөс хамгийн сүүлийн үеийн гэгдэх, олон улсын
практик шалгуурыг давж, судлаач, шүүмжлэгчдээс өндөр үнэлгээ авсан сурах
бичиг, зохиол бүтээлийг сонгож, энэ чиглэлийн таван ч номын зохиогчийн эрхийг
авах гэрээ байгуулаад байгаа.
Эдгээрийн нэг нь өнөөдөр Та бүгдэд эх хэл дээр хөрвүүлэгдэн очиж байгаа
төрийн албаны удирдах ажилтны ур чадварын тухай профессор Зегер ван дэр
Валын “21 дүгээр зууны төрийн албаны менежер” ном юм.
Би өөрөө профессор Зегерийн хичээлд топ менежерүүдтэйгээ хамт
сууж, бас энэ номыг уншсан. Төрсөн сэтгэгдлээсээ товч хуваалцъя.
Иргэдэд үйлчлэх зорилго, үүргээ улам сайн гүйцэтгэхийн зэрэгцээ
хувьсамтгай, тодорхойгүй, төвөгтэй, эргэлзээтэй болсон VUCA орчинд ажиллахад
хэрэг болох олон шинэ ур чадварыг эзэмших нь чухлыг номд өгүүлжээ.
Эдгээр ур чадваргүйгээр төрийн алба, төрийн албан хаагчид нийгмээ урагш
хөгжүүлэх хөдөлгүүр байж чадахгүй, харин ч арагш чангаасан тоормос болох цаг
үед амьдарч байгааг нотлон өгүүлсэн байна лээ.
Бид дэлхий ертөнц, нийгмийн маш хурдацтай өөрчлөлтийн энэ цаг үед
“болж байсан юм, болох байлгүй дээ” гэсэн байдлаар ажиллаад явахгүй нь ээ.
“Бүргэд өндөрт нисэх тусам алсыг хардаг”. Энэхүү номыг унших, судлах
тусам төрийн албан хаагчид алсыг харна гэдэгт эргэлзэхгүй байна.
Хандлага, сэтгэлгээний олон чухал шинэ санаа дэвшүүлэн тавьж,
холбогдох арга хэрэгслүүд, олон улсын амжилт болон бүтэлгүйтлийн жишээ,
кэйсийг толилуулсан нь уншигчдад ач тусаа өгнө гэдэгт итгэлтэй байна.
Төрийн албаны зөвлөлийн дарга Б.Баатарзоригийн хэлсэн үг, илтгэлээс...
244