Ainas po su sardu - DOMU

f) duncas po s’Italianu funt faendi totu, po su Sardu, a su chi parit, nudda.
Scipoitei s’Italianu est trempeddudu in s’interis chi su Sardu, scalaxiu, megat de
si sperdi 1 ;
g) s’Italianu tenit unu standard linguìsticu, chi iat a bolli nai arrègulas craras
po s’ortografia, sa fonètica, sa morfologia e su fueddàriu, su Sardu no. Duncas est
malu finsas a aprontai unu programa po intrai su sardu me giornalis, scolas e ofìtzius,
ca ainas de traballu de importàntzia forti, che lìburus po sa scola, gramàticas,
ditzionàrius, etc., podint presentai, po su Sardu, diferèntzias de normas, e pruschetotu
de ortografia, finsas mannas chi no fait. Duncas, tambeni donniunu si creit de tenni
s’arraxoni de scriri comenti bolit. Aici no est po s’Italianu.
Nosu nosi boleus farcai, aìnturu de is chistionis achìpias me is lìteras a) – g),
pròpiu s’ùrtima, sa de sa standardisadura de sa lìngua sarda – in pagus fueddus, unas
cantu arrègulas po s’ortografia, sa fonètica, sa morfologia e su fueddàriu – proponendi-dda,
in custa faina, po sa bariedadi campidanesa.
22
1.1. Àteras propostas modernas de standardisadura de sa lìngua sarda
Funt bessias finsas a imoi àteras duas propostas modernas de standardisadura de
sa lìngua sarda, ambaduas bòfias de sa Regioni Sarda. Sa primu, connota comenti
Limba Sarda Unificada (LSU) est bessia in su 2001. S’àtera, chi ddi nant Limba
Sarda Comuna (LSC), est bessia in su mesi de abrili de su 2006. Ambaduas proponint
unu standard a una norma sceti.
1.1.1. Limba Sarda Unificada (LSU)
est a nai: sa lìngua sarda est su Logudoresu
Sa proposta de LSU, scrita in Italianu sceti, mancai si presentessit che “una lingua
modello, basata (…) sulla selezione (…) di un modello ampiamente rappresentativo
e compatibile con il complesso delle varietà locali” e nendi puru ca “nella selezione
del modello, è stato preso in esame tutto il sardo nel suo complesso, senza stabilire
confini o preferenze” (p. 4 de sa LSU), fiat, in beridadi, una faina, mali fata puru,
de imponni in cobertantza a totu sa Sardìnnia sa bariedadi logudoresa, faendi-dda a
crei chi fessit sa lìngua sarda.
Contras de s’imperialismu linguìsticu de sa LSU si fiant furriaus medas intelletualis
e pruschetotu sa scola. Custu iat postu sa Regioni a arrimai impressi sa proposta.
1 Segundu sa circa fata fai de sa Regioni Le lingue dei sardi. Una ricerca sociologica (2007)
in: http//www.sardegnacultura.it/documenti/7_88_ 20070514130939.pdf, is fèminas de 15 a
24 annus chi fueddant “una delle lingue della Sardegna”, funt su 45,8% (Figura 1.2 p.7).
impag. Nuovo 22
9-03-2009, 19:06