Da hadde vært litt kult visst vi hadde snakka strilsk om hondra år”

Panelinformantane mine er svært verdifulle, og om tjue til tretti nye år kan ein faktisk få
panelinformantar gjennom tre generasjonar. Då kan ein jamføra materiale frå 1983, 2009 og
eit seinare år for å sjå vidare på utviklinga. Ein får då òg sjekka dagens ungdom som
panelinformantar, og det kan verta svært interessant i og med at dei er den gruppa som har eit
endra talemålsmønster. Det ville vore interessant å sjå kva som skjer med språksamfunnet og
kva det eventuelt vil ha å seia for språket.
Skarre-r-en har, som så mange andre stader, kome til Øygarden. Det som kunne vore
interessant å finna ut av, er skilnaden mellom nord og sør. Tradisjonelt har dei sør i
kommunen hatt rulle-r mykje lenger og i langt større utbreiing enn dei nord i kommunen. Det
verkar som dette skiljet oppstår i det som i dag er mi vaksne aldersgruppe, og at det kan ha
samanheng med det gamle kommuneskiljet.
I denne oppgåva har eg skrive ein del om språksamfunnet og nye normer. Mykje av
materialet handlar om nettopp dette. Som eg har skrive var del to av intervjuet ein
folkelingvistisk del, og den er interessant på fleire måtar. Gjennom å analysera det kan ein få
djupare innsyn i informantane sine (bevisste) haldningar til språket, lokalsamfunnet, storbyen
Bergen, regionen osb. Det kunne kasta lys over språkendringa på ein annan måte enn det mi
gransking har gjort.
Dette er ei gransking av det generelle talemålet i Øygarden, og eg var derfor opptatt av å
ha relativt mange variablar og informantar. Ein konsekvens av det er at eg ikkje har hatt
mulegheit til å gå inn på kvar enkelt. Ein grundig analyse av kvar variabel ville vore
interessant for å kasta lys over korfor dei utviklar seg slik dei gjer. Då kunne ein funne ut av
den spesielle V04, og ein ville fått eit meir detaljert bilete på korfor språket endrar seg som
det gjer i dei ulike årsklassane og aldersgruppene. Kva er det som endrar seg først når
bergensk møter stril, og korfor er det slik?
Ei gransking av talemålet til barn over 6 år som flyttar frå Bergen til Øygarden, ville vore
interessant for å sjå om dei endrar talemålet sitt til noko nærmare striledialekten. Som eg
skisserar i kapittel 6.3.12, ville det vore noko rart om dei ikkje endrar talemålsmønster i det
heile, og ei gransking av det som kunne jamførast med denne (eller ei meir inngåande
gransking av ungdomar i Øygarden), ville gjerne fortalt noko om korleis og korfor det nye
talemålet vert som det vert.
118