Da hadde vært litt kult visst vi hadde snakka strilsk om hondra år”

Som ein ser av denne tabellen, er det ikkje overraskande tal ut frå annan kunnskap og
fylkesstatistikk. Det fordeler seg på sirka 50 % som har flytta til kommunen og 50 % som
alltid har budd der.
4.9.4 Mellom-gruppa og eldre-gruppa
Dei vaksne trendinformantane (mellom- og eldre-gruppa) vart valde ut ved hjelp av noko som
kan minna om nettverksrekruttering. Eg ringte opp dei informantane som var med i 1983
(panelinformantane), og som endå bur i Øygarden og ikkje er for gamle. Ideelt sett skulle det
vera fire panelinformantar i kvar aldersgruppe, men eg fekk tak i tre til eldre-gruppa og fire i
mellom-gruppa (sjå kapittel 4.9.4.3). Frå lista over informantane eg hadde klart å spora opp,
laga eg ei ny liste over kven som framleis bur i Øygarden. Då eg sat med den lista, var det i
fleire tilfelle slik at eg måtte ta dei som var att, fordi det ikkje var så mange at det var nokon å
trekkja mellom. Der det var muleg å trekkja, gjorde eg det. Desse fire fekk velja ein person
som dei ville verta intervjua saman med. Slik skulle me ideelt sett få fire ”nye” og fire
tidlegare informantar i kvar aldersgruppe, som skulle vera fire kvinner og fire menn. Så langt
som råd fekk dei tidlegare informantane velja fritt, så lenge den dei valte, oppfylte kriteria (jf.
4.9.1). Også dei vaksne informantane skreiv under på samtykkeskjema godkjent av NSD (sjå
vedlegg 3 og 4).
4.9.4.1 Trendinformantar i mellom- og eldre-gruppa
Denne måten å velja ut informantar på liknar nettverksrekruttering. Dei informantane
Antonesen (1986) brukte, måtte eg ringja, men kven dei valte å ha med seg, var heilt tilfeldig.
Likevel kan ein seia at det er ein fare for at desse informantane i større eller mindre grad vil
vera valde på bakgrunn av språk. Her måtte det gjerast ei overveging. Vil ein at samtalen skal
vera naturleg ved at informantane kjenner kvarandre og er vane med å kommunisera, eller vil
ein ha eit hundre prosent tilfeldig utval. Sjølvsagt begge delar. Men det lar seg vanskeleg
gjera, og derfor har eg valt å bruka panelinformantane sitt nettverk som rekrutteringsgrunnlag.
Det er i all hovudsak to grunnar til dette. Den eine er at det ikkje er noko unaturleg med
samtalepartnaren. Det er unaturleg nok at eg stiller opp med opptaksutstyr. Den andre grunnen
er den kontrollfunksjonen dei får i forhold til kvarandre. Det er ikkje naturleg å endra
talemålet når du snakkar med ein du kjenner, og som veit korleis du snakkar i kvardagen.
54