Skólaskýrsla 2004 - Verzlunarskóli Íslands

skólalóðinni. Það er ábyrgðarhluti að teppa aðkomu sjúkrabíla með því að leggja þvert fyrir
dyr og gangbrautir og sú lagaskylda hvílir á stjórnendum skólans að sjá til þess að það sé ekki
gert. Við skulum leggja áherslu á að sýna nágrönnum okkar kurteisi og tillitssemi. Ekki
leggja í þeirra stæði og alls ekki dreifa rusli á lóðir þeirra og þá að sjálfsögðu ekki heldur
okkar eigin lóð. Reykingar eru bannaðar á skólalóðinni. Ég vil benda nemendum á að þægilegast
er fyrir þá að hætta alveg að reykja. Það er ekki erfiðara fyrir ykkur en það var á sínum
tíma fyrir kennara ykkar og skólastjóra. Sú breyting er nú gerð að skólinn hefst kl. 8:10 á
morgnana. Það er gert til þess að ljúka megi kennslu fyrir kl. 4 á daginn. Þá hefur nú verið
tekinn upp matartími fyrir nemendur enda hafa þeir lagt vaxandi áherslu á að fá heitan mat í
hádeginu og nú verður boðið upp á slíkt í fyrsta sinn. Þegar fyrsta kennslustund hefst eiga
nemendur að vera sestir við borð sitt. Ég hvet 3. bekkinga til þess að taka virkan þátt í félagslífi
skólans. Það er mikilvægt að ungt fólk taki þátt í skapandi starfi, og ég minni eldri nemendur,
sem félagslífinu stjórna, jafnframt á þá ábyrgð sem á þeim hvílir. Þeim ber að sýna
gott fordæmi í námi og stjórna félagslífinu með hagsmuni annarra nemenda í huga. Bókasafn,
tölvustofur og aðra námsaðstöðu í skólanum er reynt að hafa opna eftir þörfum. Til þess
að það sé hægt þurfa nemendur að leggja sitt af mörkum við eftirlit með umferð og umgengni
svo sem verið hefur.
Skólagjöld hafa verið ákveðin kr. 63.000­ fyrir veturinn og eiga þau að vera greidd. Ég vek
athygli á því að til er Nemendasjóður sem greiðir skólagjöld þeirra nemenda sem geta ekki
kostað nám sitt sjálfir. Umsóknir um styrk úr sjóðnum skulu berast skriflega á sérstökum
eyðublöðum, sem fást hjá Klöru Hjálmtýsdóttur, námsráðgjafa. Mikilvægt er að nemendur
kynni sér allar skólareglur vel. Auðvelt er að finna þær á Netinu og umsjónarkennarar veita
upplýsingar eftir því sem þörf er á. Til þess að komast inn á skólanetið þurfa nemendur
aðgangsheimild og lykilorð sem verða afhent í fyrsta tölvutíma eða á skrifstofu skólans. Eldri
nemendur geta notað sama lykilorð og þeir höfðu í fyrravetur. Umsjónarkennarar munu leysa
úr vandamálum þessu tengdu ef upp koma. Við sem störfum hjá Verzlunarskóla Íslands lítum
á það sem hlutverk okkar að láta ykkur nemendum í té alla þá aðstoð og aðstöðu til náms sem
í okkar valdi stendur. Við gerum hins vegar ekki hið ómögulega frekar en aðrir og það er
ómögulegt að kenna þeim sem ekki læra sjálfir .
Kennsla hefst á morgun samkvæmt stundaskrá.
Ágætu nemendur!
Að stunda nám við Verzlunarskóla Íslands er eins og að keppa í stangarstökki á Ólympíuleikunum.
Það eiga allir að komast yfir byrjunarhæðina en keppendur þurfa samt að gæta sín.
Mikilvægt er að þið kynnið ykkur vel allar aðstæður fyrirfram því þið þurfið strax að finna
hinn rétta takt, annars er hætta á að þið fellið rána. Og ef hún fellur of oft þá fallið þið úr
keppni.
Ekki komast allir í úrslitakeppnina en þó er hægt að lofa því að þau ykkar sem stundið
æfingarnar vel og fylgið ráðum þjálfara ykkar munu öll taka þátt í úrslitakeppni stúdentsprófsins.
Þegar þið fljúgið yfir rána í þeirri keppni þá munu kveða við fagnaðaróp og
klöpp áhorfenda og þjálfara ykkar og mótshaldarinn mun finna til stolts yfir að hafa skipulagt
svo glæsilegt mót.
Þið skuluð nú læra tökin á stönginni, æfa tilhlaupið og finna hið rétta jafnvægi meðan þið
svífið yfir slána með snöggu lokaátaki þar sem ítrustu krafta er neytt. Gætið þess að meiða
ykkur ekki þegar þið fallið niður í gryfjuna. Þið þurfið á því að halda að vera heil og óbrotin.
Munið vel að ef þið fellið þá fáið þið aðeins fá önnur tækifæri til að komast yfir. Þannig eru
leikreglur hér og á Ólympíuleikunum.
Góðir áheyrendur!
Nú er þessari setningu að verða lokið aðeins er eftir að segja ykkur hvað tekur við.
22