Skólaskýrsla 2004 - Verzlunarskóli Íslands

Skipulagsskrá
fyrir sjálfseignarstofnun Verslunarráðs Íslands
um viðskiptamenntun
1. gr.
Sjálfseignarstofnun Verslunarráðs Íslands um viðskiptamenntun (SVÍV) er sjálfseignarstofnun
sem starfar undir vernd Verslunarráðs Íslands. Heimili og varnarþing hennar er í
Reykjavík.
Stofnfé sjálfseignarstofnunarinnar er eigið fé hennar þann 31. des. 1997, kr. 418.163.476 í
fasteignum, kennslutækjum, verðbréfum og bankainnistæðum.
2. gr.
Markmið stofnunarinnar er að auka samkeppnishæfni íslensks atvinnulífs innbyrðis sem og
gagnvart öðrum þjóðum með því að efla og auka viðskiptatengda menntun, rannsóknir og
nýsköpun á framhalds­ og háskólastigi sem nýtist atvinnulífinu. Í þeim tilgangi rekur hún
Verzlunarskóla Íslands, sem er framhaldsskóli, og Háskólann í Reykjavík.
3. gr.
Stjórn Verslunarráðs Íslands myndar fulltrúaráð sjálfseignarstofnunarinnar og fer með æðsta
vald í málefnum hennar.
Stjórnin skipar að loknum aðalfundi sínum fimm menn í stjórn sjálfseignarstofnunarinnar og
einn til vara. Einn stjórnarmanna skal skipaður formaður stjórnarinnar.
Stjórn sjálfseignarstofnunarinnar skal skipa tvær fimm manna stjórnarnefndir fyrir mismunandi
svið hennar. Annars vegar skólanefnd Verzlunarskólans og hins vegar háskólaráð
Háskólans í Reykjavík. Auk formanns og varaformanns skulu skipaðir þrír nefndarmenn í
skólanefnd Verzlunarskólans. Jafnframt skulu auk formanns og varaformanns vera skipaðir
þrír nefndarmenn í háskólaráð Háskólans í Reykjavík. Stjórn stofnunarinnar skal kveða nánar
á um störf stjórnarnefnda og nefndarmanna í erindisbréfi.
Kjörtímabil stjórnar sjálfseignarstofnunarinnar og stjórnarnefnda er hið sama og stjórnar
Verslunarráðs. Stjórn sjálfseignarstofnunarinnar er heimilt að leita eftir tilnefningum aðila
utan Verslunarráðs um menn til setu í skólanefnd og háskólaráði. Þó skal meirihluti fulltrúa í
hvorri stjórnarnefnd vera valinn úr hópi félaga Verslunarráðs, án tilnefningar annarra aðila.
4. gr.
Stjórn sjálfseignarstofnunarinnar fer með yfirstjórn stofnunarinnar og annast umsýslu eigna,
sem ekki eru skráðar á annan hvorn skólann, í samræmi við efnahagsreikninga hennar. Hún
fjallar um fræðslumál og fræðslustarf í landinu og markar heildarstefnu stofnunarinnar í
menntamálum. Auk þess fer stjórnin með eftirlitshlutverk gagnvart skólanefnd Verzlunarskóla
og háskólaráði Háskólans. Stjórnin skal setja sér starfsreglur sem staðfestar skulu af
stjórn Verslunarráðs Íslands.
Stjórnin ein getur skuldbundið stofnunina fjárhagslega. Í starfsreglum skal kveðið á um
framsal á fjárhagslegu ákvörðunarvaldi til stjórnarnefnda.
Formaður boðar fundi stjórnar með dagskrá og minnst þriggja daga fyrirvara nema brýn
nauðsyn sé að halda fund með skemmri fyrirvara. Fundur er lögmætur ef meirihluti
stjórnarmanna situr hann. Afl atkvæða ræður úrslitum mála á stjórnarfundum en þó þurfa
minnst þrír stjórnarmenn að greiða tillögu atkvæði sitt til þess að hún teljist samþykkt.