Skólaskýrsla 2004 - Verzlunarskóli Íslands

Slit verslunardeildar V.Í. 2005
Kennarar, nemendur og aðrir góðir gestir!
Ég býð ykkur öll hjartanlega velkomin til þessarar hátíðarstundar þegar verslunardeild
Verzlunarskóla Íslands verður slitið að loknu 100. starfsári sínu.
4. bekkur.
Alls gengu 272 nemendur undir verslunarpróf og hafa nú 209 lokið prófum með fullnægjandi
árangri og verða færðir upp í 5. bekk. Það er 19 nemendum fleira en á sama tíma í fyrra. 33
nemendur eiga eftir að ljúka prófum eða þurfa að endurtaka próf og 30 hafa nú þegar fallið
endanlega.
Þegar núverandi fjórðu bekkingar hófu skólagöngu sína hér fyrir tveimur árum, voru fleiri
nemendur innritaðir í 3. bekk en nokkurn tíma áður. Það blasir nú við að þessi aukni fjöldi
innritaðra nemenda færir okkur ekki fleiri nemendur með verslunarpróf. Aukningin virðist öll
hafa fallið. Til þess að
5. bekkur næsta vetrar geti orðið álíka stór og verið hefur síðustu ár þurfa allir þeir 29 nemendur
sem eiga endurtökurétt að mæta hér í próf og sýna meiri kunnáttu en þeir hafa gert fram til
þessa.
Árangur ykkar sem náðuð prófum er þó góður sem sést vel á því að átta ykkar fá yfir 9,0 í
aðaleinkunn eða I. ágætiseinkunn eins og það heitir. Skólastjóri verður þó að vekja athygli
nokkurs hóps nemenda þessa árgangs á því, að ef metnaður þeirra eykst ekki, þá munu þeir
eyðileggja stúdentsprófið sitt. Árangur í skóla er fyrst og fremst spurning um metnað og vilja
nemenda. Þið sem kastið metnaðinum frá ykkur eruð að skemma framtíð ykkar sjálfra.
Ágætu fjórðubekkingar!
Tveggja vetra námsefni er nú að baki og að minnsta kosti jafn langur námstími. Hingað komuð
þið ung og kappsfull með lífsfjör og sjálfstraust þess sem sigraði grunnskólann með glæsibrag.
Hér hafið þið dvalið við nám, leik og vinnu, en nú sláum við striki undir þann feril og gerum
hann upp. Hvað hefur unnist og hvað hefur tapast? Allt skal dregið fram og til haga haldið. Það
er með lífshlaup ykkar líkt og rekstur fyrirtækja. Þar verður að byggja framtíð á fortíð og af
þekkingu. Þið eruð að byggja ykkur sjálf upp og þess vegna er sjálfsþekking það sem þið, öðru
fremur, þurfið á að halda. Þess vegna knýr skólinn ykkur áfram og leggur fyrir erfið próf. Ekki
til þess að koma ykkur undir mælistiku einkunna, heldur til þess að kenna ykkur að þekkja eigin
afl og takmörk. Öll stjórnun byggist á því að greina á milli styrkleika og veikleika. Allt bæði
menn og málefni og það sem mennirnir aðhafast á sér sterka og veika þætti sem greina þarf í
millum.
Þið, kæru nemendur, eruð nú á þeim aldri þegar ábyrgðin á eigin málum á að færast af öðrum
yfir á ykkur sjálf. Þið verðið í vaxandi mæli að taka ákvarðanir sjálf og bera ábyrgð á
afleiðingum. Foreldrar og skóli munu á næstu árum draga sig í hlé. Það þýðir þó ekki að þið
getið ekki lengi enn fengið aðstoð og leiðbeiningar og því síður þýðir það að hætt verði að gera
kröfur til ykkar, þvert á móti er líklegt að þær aukist. Ákvarðanir eru lykilatriði í lífi sérhvers
manns. Ég bið ykkur því að hugleiða með hvaða hætti ákvarðanir eru teknar og hverjar
afleiðingar þeirra eru. En hvað viljið þið verða og hvernig getur Verzlunarskóli Íslands hjálpað
ykkur?
Skólinn getur hjálpað ykkur að öðlast það sem þið stefnið að og hefur leitast við að gera svo á
liðnum árum. Hér hafa hæfileikar ykkar verið hvattir og slípaðir. Hér hefur þekking ykkar á
umhverfi og eðli aukist dag frá degi. Hér hafið þið orðið fyrir margvíslegu áreiti bæði
ánægjulegu og óþægilegu. Hér hafa verið lögð fyrir ykkur próf og þrautir sem þið hafið öll
glímt við og stundum leyst en stundum ekki. Þannig hafið þið lært að þekkja takmörk ykkar,
veikleika og styrkleika. Þannig öðlist þið þá sjálfsþekkingu sem ykkur er nauðsynleg til þess að
97